Gangaw Peng Min Khua Palik Sakhan Cu Tualchung Hriamtlai Phu Nih An Laak, Sakhan Chung Um Palik Le Ralkap An Thi Dih, Magway ramṭhen, Gangaw peng Min khua palik sakhan cu tualchung hriamtlai phu nih an laak khawh i sakhan chung ummi palik le ralkap zong an thi dih, tiah ABSDF phu nih Yangon Khit Thit Media ah an chim. Nihin November 3, zinglei ah Gangaw peng Min khua palik sakhan cu ABSDF telh in tualchung hriamtlai phu hna nih an kah i zinglei 9:30 ah an laak khawh, tiah theih a si.
Cu kahdohnak ah cun Min khua palik sakhan an laak i sakhan chung ummi palik le ralkap 20 hrawng cu an dihlak in an thi i hriamnam zong an laak khawhnak kong tualchung hriamtlai phu sin in theih a si. Tualchung hriamtlai phu nih hriamnam an timh i an laak hnu ah Min khua palik sakhan le a thimi SAC palik le ralkap ruak pawl cu an khangh hna, tiah theih a si. Thawng dang relchap- Media Rianṭuantu Hna Cung Ah SAC Ralkap Nih Thilsual An Tuahnak Kong Ah Dantat Ding In BNI Nih Nawlnak An Tuah.
Myanmar ram chung Media rianṭuantu hna cung ah SAC ralkap nih thilsual an tuah tawnnak kong ah ramchung, ramleng Media rianṭuan mi viakte le vawleicung hmunkip ummi vialte nih i bawm in duhlonak langhter in dantat ding ah Burma News International (BNI) nih November 2 ah nawlnak cathanh an chuah. SAC ralkap nih hramhram in nawlngeihnak an laak ni thawk in Media rianṭuantu minung 4 an thah cang hna i BNI phu chungtel ramchung rianṭuannak zung 14 zong an phihkharpiak hna.
Cu pin ah a luancia October 29 lioah BNI chungtel Development Media Group (DMG) nih Sittwe ah hram an bunhmi zung pakhat zong an rak luhhnawh i Media rianṭuantu pakhat le zunghngak pakhat an rak tlaih hna. Atu bantukin SAC ralkap nih phung an buar i Myanmar ramchung Media rianṭantu hna cung ah thilsual an tuahnak kong ah dantatnak zeihmanh a um rih lo, tiah BNI committee chairman Nanphawke nih an thanhmi ah cun a chim.
Cu bantuk ṭhiamṭhiam in September 6 ni ah Media rianṭuanmi Saizawteih cu SAC ralkap nih kum 20 chung thongtla ding in bia an rak khiahpiak. Cu pin ah hmanthlak thawngzamh rian a ṭuantu minung 2 zong SAC ralkap nih motor in an rak pah hna caah hliamfak ngai an rak tuar, tiah theih a si. November 2 ah Intenational Day to End Imputy for Crimes againt Journalists an tuah i, cu ni ah cun BNI in Media ṭhanchoternak committee chairman Soe Myint nih.
Myanmar ram cu Media rianṭuanmi thong a thlatu ram ah a pahnihnak ah aa tel tiin Committee to Protect Journalists (CPJ) nih an thanh, tiah a chim. Myanmar ram Media rianṭuanmi hna cu SAC ralkap nih misual bantukin a chawnhbiak hna caah SAC ralkap pawl cu dantat ding an si, tiah a chim chap. Burma News International cu tlangcung mi nih hram an bunh mi le kawlrawn ah hramhbunh mi Media rianṭuantu phu 15 he i funtom in dirhmi phu a si.
Leave a Reply