Pauktaw Khuapi Cu AA Nih An Lak Dih Cang

Rakhine ramkulh, Pauktaw khuapi cu Rakhine ralkap AA nih an humhak dih cang, tiah nitlaklei hriamtlai unau thum nih nizan 2024, January 24 ah thawng an thanh. 2024, January 19 ah Rakhine ralkap AA nih Pauktaw khuapi cu an laak khawh cang i Rakhine ramkulh chung ah AA nih an laak khawh hmasa bik mi khuapi zong a si. Atu cu AA nih Pauktaw khuapi dihlak cu an humhak khawh cang. Cu pinah Chin ramkulh, Paletwa peng dihlak zong Rakhine ralkap AA nih January 14 ah an laak i an humhak dih cang, tiah unau thum hna nih thawng an thanh.

Pauktaw khuapi an laak khawh hnu ah Mrauk-U, Minbya, Kyauktaw le Rathedaung pengchung hna ah hriamnam a chia duh lo mi SAC ralhrang pawl le Rakhine ralkap AA karlak ah pehtlai in kahdohnak a fah liopi a si. AA nih SAC ralhrang sakhanpi telh in an sakhan dihlak cu pakhat hnu pakhat in laak dih ding ah aa zuam lio a si, tiah cathanh an chuah mi ah an langhter chih. Thawng dang relchap- Sagaing ramṭhen, Kalay peng, Khawpuichhip khuami Salai Biakmuana (Kum 27) cu nizan 2024, January 24 zanlei ah.

SAC ralhrang nih an thah i, tualchung mi nu 2 telh in minung 5 zong an tlaih hna, tiah theih a si. Kalaymyo chaklei hmun um Khawpuichhit khua le Pyinkhonlay karlak ah nizan January 24 chun ah tualchung hriamtlai phu hna le SAC ralhrang kar kahdohnak a chuak hnu ah ralhrial ding in khuachung i thilri a laak lio ah Salai Biakmuana cu SAC ralhrang nih an tlaih i an thah, tiah thah a tongmi Salai Biakmuana he naihniam pakhat nih a chim.

Ralhrial dingin Aih-suat khuapawng a phak hnu ah inn lei ah thilri ka fim ta lai a ti i, a kir lio ah SAC ralhrang nih an rak tlaih i an thah. A ruak cu puan in an zual i an kaltaak. A hngawng ah meithal kahnak hma maw a si, namte sawhnak hma dek, hma faak ngai hmuh a si” tiah a chim chap. Cu pinah SAC ralhrang pawl nih Khawpuichhip khua a laifang ah tualchung mi pa 3 le nu 2 (An dihlak minung 5) an tlaih hna i Kalaymyo khuapi Dah-kah-sah ah an kalpi hna hnu, chunlai ah an 5 in an thlah ṭhan hna.

An 5 ningin an thlah ṭhan hna. Lakphakti man ah tiin tangka tlawmpal cu an pek hna. An phone cu SAC ralhrang pawl nih an pe ti hna lo nain hremnak zeihmanh an pe hraw hna lo” tiah tlaihkhih a tong mi hna he naihniam pakhat nih Khonumthung Burmese ah a chim ve. Khawpuichhip khua cu Tahan he meng 2 tluk aa hlatnak hmun ah a ummi khua a si i, tualchung mi hna cu Aih-suat khua le Tahan ah ralhrial in an i dor hna, tiah theih a si,crd- Lungmili Post.

Leave a Comment

Leave a Reply

Your email address will not be published. Required fields are marked *