PDF Nan Bawmh Hna Tiin Ngaphe Ah Chinmi 15 SAC Ralkap Nih An Tlaih Hna

Magwe ramthen, Ngaphe peng chung khuate pathum ah SAC ralkap nih Chinmi 15 cu PDF nan bawmh hna tiin January 16 ah an tlaih hna, tiah khuami nih an chim. Ngaphe peng i Chin miphun pawl an umnak Mahtone, Kanmyint le Kohsiyu khua ah SAC ralkap 100 hrawng an lut i, khuachung ah a ummi pa pawl cu PDF nan bawmh hna tiah an velh hna i an kalpi hna. “Tlaih a tong mi pawl hi lothlo sawhsawh an si. PDF nan bawmh hna tiah sual an puh hna nain tlaih a tong mi pawl hi ramkhel kong a thei mi hmanh an si lo.

An tlaih hnanak ni 5 a si cang. Khua hmanh ah khan an velh len hna cang caah an thah sual hna lai ti kan phang,” tiah khuami pakhat nih Shwe Phee Myay thawngzamhnak ah a chim. SAC ralkap nih an tlaih mi hna Chinmi 15 lak ah minung 2 hi an velh hnanak ah an hliamhma a fak ngai. An zapi in Padan khua i Ka-Pa-Sa ralkap sakhaan chung ah an luhpi hna. An tlaih hnanak ni 5 a rau cang nain khuami le chungkhar nih an thawngpang an hlat khawh lo caah an lungre a thei ngaingai, tiah Shwe Phee Myay nih a langhter.

Thawng dang relchap- Maraland Defense Force-MDF Nih An Ram Chung Ah Hriamtlai Phu Dang Lut Lo Ding In Ralrin Peknak An Tuah, Maraland Territorial Council/Maraland Defense Force (MTC/MDF) nih biakhiahnak an rak tuah cang bantukin Maraland Territorial Council nih a uk mi hmunram chung ah MDF dah ti lo zei bantuk hriamtlai phu hmanh luh le cawlcangh khawh a si lo, tiah nizan January 18 ah Maraland Defense Force-MDF nih an thanh.

A liamcia 2022 February 1 ni a voi khatnak Mara mipi tonpumhnak ah biachiah mi, 2022 October 28-29 ni ah tuah mi laakhruak Council tonbiaruahnak biachah mi le 2023 April 24 ni ah Maraland Territorial Council nih bia a chah cang mi ning in Maraland Territorial Council nih a uk mi hmunram chung ah MDF dah lo mizei hmanh nih hriamtlai phu an ser kho lo i cawlcanghnak nawl an ngei lo, tiah Maraland Defense Force nih cun an thanh.

Maraland Territorial Council/Maraland Defense Force (MTC/MDF) nih a herh lo mi ah buainak chuahter kan duh lo caah voi tampi ralrin peknak kan rak tuah cang ko nain a hlankan in theihternak tuah hmasa lo in Mara hmunram chung ah hriamtlai phu dang pawl lut in an cawlcang, umhmun khuar in buainak an chuahpi tawn ruang ah voi tampi biakhiahnak kan tuah mi an buar a si, tiah MDF nih an langhter. MDF le hriamtlai phu dang kar ah a herh lo mi hnahnawh buaibainak a chuah kan duh lo i atu ralrin peknak cathanh kan chuah ni thawk in a hlankan in theihternak tuah hmasa lo in.

MTC hmunram chung ah umhmun khuar le cawlcanghnak tuah ti lo ding in a donghnak bik ralrin kan in pek hna, tiah MDF nih an langhter chih. Mararam chung ah hin tualchung hriamtlai CDF-Mara an um ve i, hi cathanh kong he pehtlai in lehnak an tuahmi hmuh ding a um rih lo. CDF-Mara nih January 17 i an thanh ning ah, CDF-Mara Tactical Operation Command le Commanding Officer tel in CDF-Mara ralkap 4 cu AA le MDF nih a luancia January ni 5 le 7 ah an rak tlaih hna, tiah theih a si.

Leave a Comment

Leave a Reply

Your email address will not be published. Required fields are marked *