Khuapi Chung Kahdohnak Fak A Chuah Hlan Ah Mipi Sin I Fonh Ding In PDF-Zoland Nih SAC Ralkap An Theihter Hna, Chin ramkulh, Tedim peng ah hrambunh in a ummi tualchung hriamtlai phu PDF-Zoland nih SAC ralkap le palik pawl cu mipi sin ah i fonh ding in thawng an thanh hna i hriamnam he mipi sin ah aa fonhmi hna cu laksawng an pek hnanak kong zong an langhter chih. Ralkap le palik lawng si loin SAC kuttang ah zungrian a ṭuan cuahmah mi vialte zong mipi sin ah i fonh ding in PDF-Zoland nih nawlnak an tuah.
A ruang tampi ruang ah zung in a chuak kho rih lo mi ralkap, palik le zungrianṭuan an um rih caah khuapi chung kahdohnak fak a chuah hlan ah, a caan um liote hin mipi sin ah i fonh hna seh ti hi kan duh bik, hriamnam he mipi sin ah aa fonh mi hna cu an hriamnam zoh in laksawng pek an si hlei ah a himnak hmunhma ah kan chiah hna, tiah ṭuanvo ngeitu pakhat nih a chim.
SAC ralkap nih hramhram in uknak an laak thawk in SAC kuttang um ralkap le palik 30 leng cu PDF-Zoland sin ah an i fonh cang, tiah ṭuanvo ngeitu pakhat nih cun a chim. Thawng dang relchap- SAC Nih Tedim Peng Le Hakha Peng Ah Internet Le Phone Line An Phih, Chin ramkulh, Tedim peng ah SAC ralkap nih nihin October 13 thawk in phone le internet line an phih, tiah tualchung mi hna nih an chim. Tedim peng ah MPT, Ooredoo le Atom line pathum a ngah i October 13 in SAC nih an phih, tiah The Chindwin Post nih a langhter.
Atom line a tlaunak a sullam cu fiang tein in kan hngal lo. October 10 lio zong ah Hakha peng ah MPT phone le internet line a rak tlau ve, tiah tualchung mi hna sinin theih a si. SAC ralkap faak piin a dohtu Chin ramkulh le Sagaing ramṭhen hmun cheukhat ah SAC nih phone le internet line atu le tu an phih. A luancia September thla ah Sagaing ramṭhen hmun cheukhat ah line an rak on ṭhan. Cu ṭhiamṭhiam in October 12 zan suimilam 8:00 fai in Hakha ah Atom line cu SAC nih an phih i October 13 zanlei ah an on ṭhan.
MPT phone le internet line zong October 13 zing in an phih i zanlei ah an on ṭhan, tiah Hakha ummi nih The Chin Post ah an chim. SAC nih phone le internet line an phih tawnnak kong he pehtlai in SAC nih biapi meeting an ngeih caan le pakhat khat thil tuah an duh caan ah phone line an phih tawn, tiin SAC he naihniam in a ummi hna nih an chim.
Leave a Reply