Chin ramkulh ah Covid-19 zawtnak hrik a karhnak hnga lo ramkulh chung lut chuak nak gate vialte le khuapi chung lutnak gate vialte cu August 27 ni thawk in tha tein an chek tiah theih a si.
Rakhine ramkulh chungah Covid-19 a karh tuk mi ruangah Chin ramkulh zongah tu bantukin cheknak an tuahmi a si i zawtnak a umnak ram le ramkulh in Chin ramkulh chung a lutmi paoh cu Quarantine chiah an si lai tiah theih a si.
Chin ramkulh Minister of Social Affairs Pu Pauu Lun Min Thang nih “Gate cu chek tawnmi a si nain tu tan cu vawi dang nak in felfai deuh in cheknak an tuah. Atu lio sining ahcun Rakhine ramkulh ah Covid-19 mizaw an karh tuk cang. India lei kap ramri khua hna ahcun Lockdown tuah than a si ruangah cheknak kan tuahmi a si. Covid-19 he pehtlaih in cawnpiaknak tete zong tuah peng a si” tiah a chim.
Chin ramkulh chung khuapi pawl zongah khualtlawnmi cheknak, taklinh cheknak, ngandamnak cheknak pawl le Covid-19 he aa pehtlaihmi cawnpiaknak tete tuah peng a si ti si.
Chin ramkulh chung ah Covid-19 in a zaw liomi minung 4 an um i Tedim khuapi cozah siizung ah thlawpbul cuahmah lio an si. Nihin August 28 tiangah Kawlram chung Covid-19 mizaw 628 an um cang i cu chungah minung 349 an dam than cang. Minung 6 an thi tiah theih a si.
Ref: DVB
Leave a Reply