Pi Biaksui Le A Hawile Thah An Tonnak Kong Ah CDF-Mindat Nih Fainter Nak A Tuah Cang Hih

Pi Biaksui le A Hawile Thah An Tonnak Kong Ah CDF-Mindat Cu Pehtlaihnak Kan Ngei Lo, Tiah Cathanh An Chuah, India-Myanmar ramri ah Pi Biaksui le a hawile pahnih thah an tonnak kong he pehtlai in CDF-Mindat cu pehtlaihnak kan ngei lo, a dikmi thil a langh khawh nakhnga kan si khawh chung kan i bawm lai, tiah CDF-Mindat nih nihin March 29 ah cathanh an chuah.

CDF Mindat nih cun hi bantuk thil a cangmi hi fakpi in kan doh, taantak mi chungkhar le hawikom nan ngaihchiatnak kan in hrawmpi hna, tiah an cathanh ah an langhter. “Hi thil a cangmi kong ah pehtlaihnak a ngeimi hna hi CDF-Mindat chungtel an si lo, Mizoram ramkulh in Magway ramṭhen Pakokko pengkomh, Myaing peng ralhrial hartong hna caah herhhai thilri a zalhpiaktu an si.

Thil dik a langh khawh nakhnga ṭuanvo ngeitu bu hna bawmhchanh ding ah timhcia kan si ko,” tiah CDF Mindat nih an langhter chap. Pi Biaksui le a hawile thihnak kong he pehtlai in MTP, Sub-HQ: Chhaolô le YLA,Sub-HQ: Bualpui hna nih an ramchung i Myanmar-India pehtlaihnak lam hna cu nihin Vaute 29 in an phihkhar i, duhlonak cathanh an chuah.crd- The Chin Post.

Thawng dang relchap-Myawady I Kahdohnak Ah Palik Bawi Nay Soe Telh In Palik 7 An Tlau, 4 An Thi Tiah SAC Nih Telegraph Ca A Chuah, Karen ramkulh, Myawady chawleh chawhrawlnak zone kahdohnak ah palik bawi changtu Nay Soe telh in palik 7 an tlau, palik 3 le ngunkhuai khawltu pakhat an thi tiah SAC nih Telegraph ca a chuahmi ah a langhter. A luancia March ni 25 ah Myawady chawleh chawhrawlnak zone le.

Tinkan Ngyinaung palik sakhan cu kahdoh an tong i palik 3 ṭatkyatkyi Htay Win, ṭatkyatkyi Phone Myo Aung, palik Htat Su le ngunkhuai khawltu Nay Lin tiin 4 an thi. Palik bawi changtu Nay Soe, ṭatkyatkyi Myo Kyaw Thu, ṭatkyat Tin Htawy, ṭatkyat San Htwit Aung, ṭatkyatkyi Min Zaw Aung, ṭatkyat Hla Soe le palik Ye Paing hna cu an tlau tiah theih a si.

Tinkan Ngyinaung palik sakhan kahdohnak ah cun palik bawi duh-ṭatkyat Aung Myo Win cu a cal ah hriamngan kuan nih a peh caah hliamhma a tuar tiah SAC nih Telegraph ca a ṭialmi ah a langhter. Cobra Column nih cun Myawady chawleh chawhrawlnak zone cu luhhnawh in kan kahdoh hna, palik 11 an thi palik 7 le palik chungkhar in 1 kan tlaih hna tiah phungning tein cathanh a chuah.crd- The Chin Post.