Australia ah myanmar in sianginn a kaimi hna cu ralhrang cozah nih cdm ah i tel lo dingin a hro hna, Australia ahhin Myanmar in sianginn a kaimi siangngakchia tampi an um i cu chungah cozah riantuan a simi, cozah bawmhnak in a kaimi zong an tampi. Cu cozah bawmhnak in Australia ah sianginn a kaimi hna cu ralhrang cozah nih CDM ah i tel lo dingin hronak ca a kuat hna tiah theih a si.
Cu cakuat cu Australia hrambunh ABC News sinah a phan i cuticun ABC News nih Myanmar siangngakchia pahnih cu biahalnak an tuah hna. Ralhrang cozah cakuat ah cun nawl na ngaih lo i CDM ah nan tel ahcun fak piin dantat nan si lai tiah an tial. Midang zong i tel dingin sawm hlah u, an ti fawn hna. CDM ah kan i tel lai lo timi biakamnak cu a tlai bik July 7 ah kuat ding ti a si.
Biakamnak tuah cu an duh lo tuk, asinain an tuah lo ahcun Myanmar ah a ummi an chungkhar nih an tuar sual lai ti an phang fawn. Cozah bawmhnak in Australia ah sianginn a kaimi hna cu lungrethei le thinphang in an um ko. Australia cozah nih ralhrang cozah cungah a cawlcangh ning a nem tuk, fak piin dantat phihkharnak tuah seh tiah Australia hlutdaw le Myanmar siangngakchia hna nih biatak tein an forh peng.
Thawng pang dang relchap; Dipeyian ah ralhrang nih kahnak in mipi ruak,ruak 6 hmuh chap asi,an dihlak ah 25, Sagaing ramthen,Dipeyian nichuah lei khua ah ralhrang nih hriamngan in an kah hna nak ah khuami hliammi le nunnak liammi an um hna i,nihin July zinglei ah ruak ruakruk char than asi.
July 2 zinglei ah ralhrang thazaang 150 tluk cu Dipeyian ni chuahlei khua ah mawtaw pathum in an ra i an kahnak hi asi. Zingka,chun,zaanlei ah a cangmi i kahnak ahhin ralhrang nih hriamngan in voi 60 leng an kah i,Khua a hnorsuan caah mipi hliammi le nunnak liammi an um hi asi.
A nunnak a liammi khuami hna ruak hi zahan tiangah ruak 19 hmuh asi i nihin zinglei ah ruak 6 char chap asi tiah theih asi. Nizaan ah an ruak lak lio ahhin ralhrang an phanh caah kan zaam,tuzing zong ruak char lio ah an rat than caah kan zaam” tiah khuami pakhat nih achim.
July 2 Dipeyian nichuah lei ah ralrang nih thazaang hmang in le hriamngan in an kah caah khua khuaruk in mipi a thong leng an zaam. Khuami cheukhat an tlaih hna i hliamtuar mi 10 hrawng an um.Ralhrang rual cu khuachung phungki inn ah umhmun an khiar,mipi hna cu hramhlak ah an zaam hna.crd-the hakha post.
Leave a Reply