Poi Ko ZRA Nih CDF-Tonzang Sakhan 2 An Kah

ZRA Nih CDF-Tonzang Sakhan 2 An Kah I CDF-Tonzang Ralkap Pakhat Nunnak Liam, Chin ramkulh, Tonzang peng hrambunh CDF-Tonzang sakhan 2 cu ZRA nih September 10 ah an kah i CDF-Tonzang ralkap pakhat a nunnak a liam, tiah CDF-Tonzang nih an thanh. September 10, CDF-Tonzang sakhan 2 kahdohnak ah ZRA lei zong hliamhma pumi an tam i Lungṭat khua lei ah ZRA pawl cu kir in khuami cycle 7 an laak hnuah an zaam, tiah CDF-Tonzang nih cun an langhter.

CDF-Tonzang in ṭuanvo ngeitu pakhat nih cun, “ZRA nih kan sakhan 2 an rak kahmi cu a dikmi a si ko. Nain kan ngaih a chiat lio caan te a si caah fianghlang tein ka chim kho rih lai lo,” tiah Khonumthung Burmese ah a chim. ZRA nih Pathian biak ni zarhpi ni caan zong hrial loin an kan kah i kan ralkap pakhat a thimi hi CDF-Tonzang le Zo miphun nih kan philh kho hrimhrim lai lo, tiah CDF-Tonzang nih cun an langhter.

August 31 lio zong ah CDF-Tonzang Battalion 3 sakhan cu ZRA le SAC ralkap nih an rak kah i CDF-Tonzang in ralkap pakhat a nunnak a rak liam pinah riahcaw le zen-kuan tam ngai an rak chuh cang hna. CDF-Tonzang Battalion 3 kah an ton hnu September 5 ah ZRA cu teirul kan cham hna lai, tiah cathanh an rak chuah hnu September 10 ah kah an ton ṭhan hi a si, crd- The Chin Post. thawng dang relchap-Chin Ramkulh Ah Bomb Lamsualnak In Minung 20 Nunnak A Liam I 37 Hliam An Tuar.

SAC ralkap nih nawlngeihnak an laak hnu in Chin ramkulh ah 2023 August thla tiang ah vawlei tang hmanhmi bomb le SAC ralkap ralkap nih an tunhmi bomb ruangah minung 20 nunnak a liam i, minung 37 hliam an tuar, tiah CHRO nih September 11 ah an thanh. SAC ralkap nih chikkhat an i dinhnak biakinn le cacawnnak sianginn ah bomb an hmanhmi cu an kal hnu ah khuami hna nih an i lamhsual tawn, tiah CHRO ṭuanvo ngeitu pakhat a simi Salai Mang Hre Lian nih RFA ah a chim.

SAC ralkap hna nih hin bomb hmanh hna hlah sehlaw tualchung mi hna nih hi harnak hi kan tong hnga lo. An phaknak poh ah ti awk in bomb an hmanhmi cu an kaltaak caah tualchung mi hna an i lamh i, a hmun ah a thimi zong an um bantukin cheukhat cu kut kiakmi le ke kiakmi zong an um,” tiah a chim chap. 2021 kum ah hmanhmi bomb ruangah minung 4 nunnak a liam i minung 2 hliam an rak tuar. 2022 kum ah minung 9 an nunnak liam i 17 hliam an rak tuar. 2023 kum ah minung 7 nunnak a liam i 18 hliam an tuar, tiah CHRO nih cu an langhter.