Poi Tuk Ee Paletwa Peng Ah Ngakchia Telh In Tualchung Mi 4 An Thi

SAC Ralkap Vanlawng Bomb Thlak Ruang Ah Paletwa Peng Ah Ngakchia Telh In Tualchung Mi 4 An Thi, Chinram thlanglei, Paletwa peng Kyile khua ah SAC ralkap nih vanlawng in bomb an thlak ruang ah kum tling lo ngakchia telh in tualchung mi 4 nunnak a liam i, minung 3 hliam an pu, tiah theih a si. A luancia January 15, chunhnu suimilam 2:00 hrawng ah kaphnih kar kahdohnak um lo in SAC ralkap nih raltuknak vanlawng Jet Fighter in Kyile khua ah hramhram in bomb an thlak i.

Kum 5 ngakchia pakhat telh in tualchung mi 4 an nunnak a liam pinah minung 3 hliam fak ngai an pu, tiah theih a si. Paletwa peng cu kan uk dih cang i SAC ralkap an um ti lonak hmun a si tiin Arakan Army nih an thanh nain Paletwa hmunram chung ah kahdohnak dai loin SAC nih vanlawng in kahdohnak an pehzulh. Thawng dang relchap- Yesoechaung Byuha Sakhan In A Zaam Mi SAC Ralkap 150 Tluk Cu Arakan Army Nih An Tlaih Hna.

Rathedaung peng Yesoechaung Byuha sakhan le a pawngkam sakhan in a zaam mi SAC ralkap 200 hrawng cu Rakhine ralkap AA nih an kah hna i minung 150 tluk an tlaih hna, tiah theih a si. Yesoechaung Byuha sakhan le Amyatdaung ralkap sakhan ah umhmun a khuar mi SAC ralkap pawl cu January 13 ni ah Myintaung khua sakhan an i ṭhial hnu ah Mayu tivapi zulh in ralkap tilawng he zaam an i timh lioah AA nih erhkhumh in an kah hna i ralkap 40 hrawng an thi, tiah AA nih an chim.

Cu pin ah a luancia January 12 ni ah Mrauk-U peng Teinnyo khua pawng Linmwaytaung sakhan in SAC ralkap 100 leng a zaam mi pawl cu AA nih an kah hna i ralkap thi le hliam an tam, tiah theih a si. A liamcia 2023 November 13 ni thawk in thla hnih leng chung ah Rakhine hmunram chung kahdohnak ah Rakhine ralkap AA nih sakhan 160 hrawng an laak khawh. Cu pin ah Rakhine ramkulh he ramri Chinram thlanglei Paletwa peng zong AA nih a ningpi in an uk cang i Rakhine ramkulh Mrauk-U, Minbya, Pauktaw, Ramree khuapi chung hna ah pehzulh in kahdohnak an kalpi, tiah theih a si.

Leave a Comment

Leave a Reply

Your email address will not be published. Required fields are marked *