Pu Ngun Maung Nih CNLD Party A Kaltak Cang Hna

By- Salai Lungthli Tum: USDP cozah chan ah Union Deputy Minister tiang a rak tuan balmi Pu Ngun Maung cu CNLD candidate thimnak he pehtlaih in a lungtlin lonak a um ca ah a kaltak cang hna, independent in aa cuh lai.

Hakha peng CNLD candidate thimnak ah Pyithu Hluttaw candidate ticket cu Pu Ngun Maung le Saya Robin an rak i cuh, nain EC vote ning ah Saya Robin nih a tei.

EC thimnak kong ah Pu Ngun Maung nih,”A hlan ah cun EC nih candidate thim tikah Hakha peng khuate kip in EC chungtel pakhat cio kawh dih a si tawn, cu tikah mipi duhmi candidate an chuak kho.

Nain, tutan cu khuate lei chungtel pakhat hmanh kawh an si lo, Hakha khuapi um EC lawng nih thimfung thlak a si ruang ah ka sunghnak a si,” tiah a chim.

Hakha peng ah Pyithu Hluttaw MP ai cuh ding minung pathum an si cang– NLD in Pu Tial Ling, CNLD in Saya Robin le independent in Pu Ngun Maung an si.

Biadang ah, CNLD cu arti an khuai khawh hlan ah an party lehlam arti bang a kuai ruangmang ko cang mu.