Pu Ronaldo Cu Kir Hnuin 1 Million A Tthang Cho Colh

CBN sport news, 28 Aug : Cristiano Ronaldo cu Manchester United ah a kir than lai timi thawng a fian hnu suimilam tlawmpal ah Man U Instagram followers Ting 10 (1 million) renglo an karh manh. Ronaldo transfer a fian hlan ah khan Man U nih Instagram ah 43.1million followers an ngei.

A hnu Ronaldo Man U luh thannak ding thawng a fian hnu tlawmpal ah followers 44.3m ah an karh manh. minung ting 12 hrawng nih Man U lei an hoih than tinak a si. Ronaldo transfer a fian hnu ah thawngpang hlat duh ah Manchester United official website cu a kautu an tamtuk ruang ah an website aa rawk (crash) i a sinain an remh than khawh.

CR7 Man U transfer hnu Man U Instagram followers karhnak hi suimilam tlawmpal chung te lawng a si. Voi 2 nak Man U a luhthan nak ah Man U fans minung million renglo aa luhpi cawlh tinak a si. Lionel Messi zong kan philh kho lai lo, PSG a luh suimilam 24 (nikhat) chhung ah PSG instagram followers kha 19.8 million in 40.2 million a phan manh.CBN

Thawng dang; Nizan August 26 ah Mizoram State Law Commission Lal Khobung hruainak in tonbiaruahnak ngei mi nih India phunghrampi article 344(1) le 351 hngatchanh in tuah mi 8th Schedule ah Mizo holh telh ve a si khawhnak dingin Mizoram cozah sin ah chim an timh.

Nizan ah tuah mi meeting nih India phunghram article 344(1) le 351 hngatchanh in tuah mi 8th schedule ah Assamese, Bodo, Manipuri, Nepali, holh dang cu telh a si caah All India Service competition exam dangdang UPSC, SSC le State Public Service Commission nih a hawihawt subject/syllabus ah an holh (language) cu telh a si ruangah tampi an tha hnem pi.

Mizoram State Law Commission nih 8th schedule ah Mizo holh telh a si ve lo mi cu midang tluk lo nak pakhat ah kan ruah i, Mizo holh (language) telh a si khawhnak dingin Mizoram cozah nih tanlak dingin kan duh tiah an ti.

India phunghram (scheduled tribes) order 1950 (part III- rules and order under the constitution) ah scheduled tribe list ah Mizo miphun vialte chimnak caah ‘Any Mizo (Lushai)’ tiah an tial mi cu ‘Mizo cu Lushai an si’ tiin ruah khawh a si caah Lushai a si lo mi hna nih Mizo chungah kan i tel ve lo, a kan huap lo tiin an ruah khawh mi a si.

Assam state chim lo Tripura le state tam deuh le UT cheukhat scheduled tribes list ah ‘Any Mizo Tribe’ a tel ve lo nak state le union territories ah ‘Any Mizo Tribe’ telh dih a si khawhnak caah Mizoram cozah sin ah chim ding.

Cu lengah Mara le Lai miphun hna cu an hnam min dik deuh tiah ruah bantukin (Pawi le Lakher) tiah district council min pek mi cu (Mara, Lai) district council tiin thlen a si cang nain, India constitution ah Pawi le Lakher tiin an tial peng rih mi cu thlen dingin Mizoram cozah nih tawlrel dingin hnatlaknak an ngei tiah Zothlifim daily news nih a tial.TCP

Leave a Comment

Leave a Reply

Your email address will not be published. Required fields are marked *