Tulio kan Laimi chung in Pu Siang Kung nih khuachia khuavang a hmuhnak cu vawlei cung hmunkip um Laimi dihlak nih kan theih dih ngawt rua tiah ka ruah. Thil a cang bal theng lomi a si tikah a tanglei bantuk Pu San Hre nih a tialmi kong ruah chih awk a um ngai. Pu San Hre nih a tialmi cu;
Mizoram Peace Accord (1986) Mizoram Deihnak Hnatlaknak ah minthang hruaitu Laldenga khi lung rethei ngai in dothlennak an tuah lio le India Cozah pi hi zei tin dah kan tei ning a si lai tiah lung si vang ngai in ramlak an camp ah khua a tuak tan cuahmah lio ah a kuttang pa khat nih Pu Laldenga cu mi pakhat nih a herh ngai mi biachim ding kan ngei. Ton kan duh. A herh tuk hringhren a ti le ka rak luh ter lai maw a ti an ti.
Pu Laldenga nih mah cu a ho ko dah a si? Zei bantuk thawngpang dah chimh a ka duh? Van luh ter hnih uh tiah a kut tang a cawngtu pawl cu luhnak nawl a pek ter hna an ti. Pakhat pa cu Laldenga a camp chung cun a va lut. Direct bak in a sining ai chimh colh an ti.
“Kei mah cu tlangkual cerhti ah sa ka bawh lio ah cakei a rak ra i cakei cu a zak bak ah ka kah. Cakei cu thih leh loin minung aw bak in a ka pamh hnu ah na ka kah hrimhrim. Rak i zoh tiah a ka ti ta i a tli diam. Rianrang tein riahbuk lei ka panh colh. Mah zaan cu ka hawi le ka chimh hna i ka veng uh khuachia nih lak an ka tim ka ti cuahmah lio ah ka hawi le hmai ah an ka lak i khuachia sin ah caan zei maw zat ka um.
An ka thlah hnu inn ka phak hnu lawngah ni 9 chung ka tlau kha ka theih tiah a ti an ti. An mah khuachia sin an ka um i taza an ka cuai. Ka kah mi khuachia kha an siangpahrang fa nu dawh a rak si. Asinain, biaceih zung ahcun ka sining le ton ning tein ka chimh tikah khuachia siangpahrang fa nu cu an biaceih tu nih na palh. Zei ruangah dah cakei in nai langh ko mi cu an ka kah ko lai teh. Cun, na pamh chep rih. Hi pa hi a sual lo tiah bia an khiah.
A thaizing cu na khua ah kan in chiah lai an ka ti. A zaan ah an khuachia siangpahrang pa cu ka sin ah a ra i kan sin ah kan in laknak hi suallam a ngei. Thaizing ah va kir law Laldenga kha va chim. India Cozah he deihnak rak lak zokzok seh. Mah lo ahcun thiseng tam tuk a luang pin ah teinak a hmuh kho lai lo tiah bia an ka cah. Mah cu kan rak chimh a ti an ti.”
Pu Laldenga cu sau nawn holh loin a um hnu ah a thawpi a chuah le ummm, aw, a si hrim deihnak ka lak hrim a hau tak cang rua lai a ti an ti. Khuachia bia cah phurtu cungah lomhnak a chim i a lawi ter. Cu hnu zarh 2 ah India Cozah he Mizoram Deihnak Hnatlaknak pi cu min a thut an ti.
Ka hngakchia lio Tang 5 hrawng ka kai lio ah mah kong hi an chim ka rak theih. Upa sin biaruah ngeih ka rak huam tuk nak ah ka rak theih mi a si. Ka Facebook hawi hna mah kong hi a thei bal mi nan um el maw? A si kho mi a si hnga maw? Tam deuh a thei mi nan um cun rak ka chim cio ve hnik uh law.
A cunglei bantukin Pu San Hre nih a tialmi cu a si. Tutan Pu Siang Kung nih khuachia khuavang a hmuh ning he aa lo pah i, Chin ramkulh chung thilcang a si tikah, CNF kan pale nih dohthlennak an tuahmi hlawhtlinak hna a si ve hnga maw timi ruah awk a um ngai. Zeitin nan ruah ning a si ve. Nan ruahnak free comment khawh a si.
Chirhchan: San Hre
Leave a Reply