Pyusawhti Pakhat Cu PDF nih Kyats Sing 100 bak An Pek

Meithal He PDF Sinah A Lutmi Pyusawhti Pakhat Cu Kyats Sing 100 An Pek Sagaing ramṭhen, Yinmarbin peng Banbuai khua um pyusawhti sakhan in pyusawhti pakhat cu May 20 zanlei suimilam 3:00 hrawng ah AK 47 meithal le zenkuan he kan sin i a rak luh caah phaisa kyats sing 100 kan pek i a chungkhar hna zong a himnak hmun ah kan chiah hna, tiah tualchung hriamtlai Bo Tauk Htun phu in ṭuanvo ngeitu pakhat nih a chim.

Hi kong he pehtlai in ṭuanvo ngeitu nih cun, “Anih hi chuah a duhnak a sau ngai cang nain caan rem a um lo caah tuan in a chuah khawh lonak a si. Atu zong dum ah mehhang ka zal lai tiin a hawile a hlen hna hnu ah a zam i, a chungkhar hi minung 9 hrawng an si caah mipi sin ah phaisa cawi chung in kyats sing 100 kan pek hna,” tiah a chim. Pyusawhti pa cu AK 47 zun 1, kuanbawm 3 le meithal kuan 90 he a zam, tiah theih a si.

Thawng dang relchap-Mocha Thlichia Totho Ruang Ah A Thimi Minung 145 Tiang A Phan, Rohingya Harsa Hna Dornak Ah Minung 91 An Thi, Mocha thlichia totho ruang ah Kawlram ah a rawkmi le nunnak a liammi an karh chin, a hnu bik cazin an chuahmi ah a nunnak a liammi minung 145 tiang a phan cang, Rohingya harsa hna dornak sakhaan ah minung 91 tiang an nunnak a liam cang, tiah SAC ralhrang nih thawng a zamh.

Rakhine ram Rohingya hna Mocha thlichia le totho ruang ah an dirhmun le an sining cu ni 5 a rauh hnu lawng ah SAC ralhrang nih thawngzamhnak a tuah. Mocha thlichia le totho ruang ah Rohingya chung ah a nunnak a liammi minung 91 tiang an phan cang. Rohingya pawl an i dornak sakhaan ah minung 400 reng lo an nunnak a liam timi thawngpang cu a dikmi a si lo, tiah SAC ralhrang nih a chim. Rohingya minung 120,000/ reng lo chung in minung 60,000/ reng lo cu.

Mocha thlichia a luh hlan ah himnak hmun ah an zaam manh, tiah SAC ralhrang nih thawng a zamh. Thawng an zamhmi ah Rohingya timi biafang hmang loin Bengali miphun tiah an hman piak hna. Mocha thlichia ruang ah bawi no pahnih le ralkap pahnih an nunnak a liam, tiah SAC ralhrang nih a chim. Mocha thlichia ruang ah har a tongmi hna bawmhnak pek awk ah a kal dingmi hna, UN le NGOs telh in SAC ralhrang nih an phih kham rih hna.