Tu lio cu Kovid pulrai zawtnak ruangah vawlei cung lung rethei in kan um lio ah khat lei in accident phunphun nih vawlei cung minung a kan thah thluahmah ve.
Pulrai zawtnak nih vawlei cung minung a kan thah lawng si loin thil chia ti let le ttek ti bantuk tiang nih vawlei cung minung a kan thah thluahmah ko. Cu lio ah mah le mah a herhnak ah i ralring thiam lo ruangah accident in a thimi zong an tam liangluang ve.
Nihin 2020, August 2 ni zongah Kawlram, Mawlamyine myone, Thiri Myine (12) lam pawng i tidil pakhat ah mipa pakhat a tum i ti aa liohnak ah a nunnak a liam tiah theih a si. A thimi pa hi U Aung Tin fapa U Khun Hla Min (kum 40) a si i a thih ning hi nihin chun suimilam 2:00 pm hrawngah tidil chung ti lioh ah a tum i a tla tiah theih a si.
U Khun Hla Min hi Daw Tin Tin Nwe pasal a si i a nupi he fanu fapa pathum an ngeih hna. An fale cu kum 7 pa ngakchia pakhat, kum 3 nu ngakchia pakhat le kum 2 pa ngakchia pakhat hna an si i Mawlamyine khuapi ah inn hlang in khuasami an si tiah theih a si.
Hi hna chungkhar hi rian thathi a ngeilomi chungkhar an si i an nuva in an hmuhmi rian paoh tuan in kawl chawm ei chawm in khuasami an si pinah an fale hna zong kutdawh rian an tuanter pah tiah theih a si.
A thimi U Khun Hla Min ruakpum cu tuanvo ngeitu police hna nih an zohfel hnuah Thiri Myine Rescue phu nih ti chung in an chuak i Mawlamyine Rescue phu nih siizung ah an kalpi tiah theih a si.
Ref: ZM
Leave a Reply