Khrihfa tha le Kawlram minthang hlasakthiam Mi Mi Khe cu caan saupi a dam lo hnu ah a nunnak a liam cang tiah theih a si. Mi Mi Khe thihnak kong cu a pasal thing Kawlram minthang hlasak thiam Htoo El Linn nih a facebook account ah a ngaihchiatpinak a tarlangh i, Kawl media ngan pakhat a si ve mi Akonthi nih a tarlangh chin hi a si.
Hlasakthiam Mi Mi Khe cu a chungkhar he Australia ram an um lio ah Cancer zawtnak aa thlawpbul. A luancia thla tlawmpal chungah cancer zawtnak a hnubak level tiang a phan cang ti si i, a cavorhlei ke ruangah lam a kal kho ti lo.
A cancer zawtnak hi level 4 tiang a phan i, siibawi te an izuamnak le amah thinlung a thawng tuk caah caan sau nawn aa chang kho ve. Cu ti cancer zawtnak a tuarmi hlasakthiam Mi Mi Khe cu a taksa nih a celh ve ti lo caah nihin October 16, 2020 ni, Australia caan zanlei suimilam 9.30 pm ah Cung Pathian sin a kan dinh tak hi a si.
Mi Mi Khe thihnak kong he pehtlaih in a pasal thing hlasakthiam Htoo El Lynn nih “Na thih hlan ah thlacampiak khawhnak caan tha ka rak ngei” tiah a facebook ah a tarlangh hi a si.
Mi Mi Khe cu kan hnulei ah a thi cang tiah thawngpang deu a rak thang ruangah amah pumpak zong nih fianternak a rak tuah i tutan cu fianternak tuah than khawh ding dirhmun si loin a kan liam tak taktak cang tiah Swelsone News nih a tarlangh ve.
Ref: Akonthi, Swelsone News
Leave a Reply