Peace Process and Transition in Myanmar: Challenges, Opportunities and Prospects 1: Salai Aung Myint Salai Van Aung Myint cu B.Sc. Degree a dih hnu ah Public Administration (MPA) in National University of Singapore (NUS) ah Master Degree zong a la cangmi a si. Thantlang peng Surngen khuami a si. Mai Hla Aye Mai Hla Aye cu MIT tang ah a ummi BARS Program in B.A. in Social Science a dih hnu ah Hungary ram ah a ummi Central European University in Public Administration in Master Degree (MPA) a dihmi a si.
Thantlang peng Surngen khuami a si. Salai Za Ceu Lian Salai Za Ceu Lian cu B.A. (Honors) in Political Science, University of Winnipeg (Canada) ah 2009 kum ah Bachelor Degree a ngah hnu ah M.A. in Political Science, University of Toronto ah Master Degree a dih cangmi a si. Thantlang peng Leitak khuami a si. Kum 70 renglo Kawlram nih buainak a tonmi le a dikmi ramkhel thlennak a chuahpi khawh lonak a ruang cu Panglong hnatlaknak a tlam a tlin khawh lo caah a si tiah an chim tawn.
Panglong hnatlaknak a muru cu Kawlram ummi tlangcung mi le Kawlmi a ruangte in ramkhel covo ngeih le thleidannak um lo kha a si tiah kan ti khawh. Cu bantuk in aa ruangmi ramkhel covo kan ngeih khawhnak caah tlangcungmi dihlak nih hriam an tlaih i cozah an doh. Nihin tiang kum 70 renglo a si cang. Asinain tlangcung mi nih kan duhmi ramkhel covo cu kan hmu kho hlei lo. Cu covo hmuh khawhnak caah lam pahnih a um tiah an chim tawn. Thimnak luh in phunghrampi remh, siloah, phunghrampi leng in thlennak tuah a si.
Cucu Remdaihnak lamthluan Peace Process kan timi cu a si. Thimnak le a chung luh in thlennak tuah cu nihin dirhmun in a si kho lo tiah zapi nih zumh a si. USDP in, NLD in cozah pahnih an kai cang nain – tlangcungmi nih kan duhmi phunghram an remh khawh lo pin ah a dikmi Democracy le Federal thlennak zong an tuah kho lo. Atu ah cu thlennak dik tuah khawhnak ah lam pakhat lawng a tang cang. Cucu tutan kan ceih dingmi “Remdaihnak lamthluan (Peace Process)” hi a si.
Process kong ah a chung in aa telmi tlangcungmi hriamtlai kan pale, cozah, ralkap an aw-aan tampi kan theih nain, a karlak ah pehtonnak (mediator) a tuahtu, a leng in fimthiam hna (dothlatnak a tuahtu) nih an cuanhning hi hmurka in kan theihmi a tlawm. Cu bantuk pawl nih an cuanhmi cu kaptanhmi a ngei lo i – nihin Kawlram remhdaihnak lamthluan ah harnak le hmailei kong tampi mipi lam an kan hmuhsak khawh lai tiah kan zumh.
Cucaah tutan ah Fidi Foundation (The Chinland Post) nih Kawlram remdaihnak lamtluan ah dothlatnak a tuahtu le naihniamte in an fimthiamnak hmang in rian a tuantu an hmuhning theihding ah “Intellectual Talk” kan vun tuahnak a si.
Leave a Reply