Tuanbia ttial thiampa, William Shakespeare nih a ttialmi, “Romeo and Juliet” kong an rel ruang le video thlakmi an zoh ruangah mino tampi cungah mah le mah i thahnak a rak karhter ngaingai. A ruang cu kha bantuk in mah le mah nunnak i lak kha mi ralttha ngai ah an ruah sual hna caah a si. Aung San Suh Kyi nih “ Raltthat” a timi cu a dikmi, a hmanmi kong ah biatak tein dir ngam, thil diklomi cungah doh ngam hi ralthatnak ah a sangbik a si” a ti. Ka lung a tling tuk hringhran.
Hri i awh, mah le mah nam in i sawh, mi that, zun din luantuk ruang i thih cu ralthat a si lo. Hruh a si. U Ko Ni cu kawlram uknak 2008 upadi kongah ralttha ngai in a hman lonak kong a chim ngammi a si caah ruah lo piin January 29,2019 zaanlei 5:00 hrawngah Indonesia ram in a tlun lei Yangon airport ah meithal in an kah i a thi. Mi thattu pa a zaam lio ah Taxi mawngtu pa, Pu Ne Win nih meithal aa kenmi pa cu ralttha tak in a dawi i, tlakrawh ai lak i a cheh. Mi thattu pa nih Pu Ne Win cu a meithal in a kah i a thi ve.
A hmanmi, a dikmi ruangah Meithal aa ken ko mi, tlakrawh i lak zau i dawi ngam ruangah a nunnak a liammi pa, Pu Ne Win cu kawlram mizapi lungthin a khehkhuai caah a thih taakmi a nupi le a fale vialte cawmnak dingah mi tampi nih phaisa an pek hna, kawlram Bank tampi nih laksawng tampi an pek hna. “Raktthat” cu a pawngkam ah biatak, thil dik, thil hman a dirpi ngammi khi an si.
Adam hi mi ralchia ngaingai a si tiah kan ti khawh. Aruang cu a nupi nih sualnak a tuah lioah a zoh sawhsawh, a doh lo, a el zong a el lo, a tuahmi tu kha a tuahpi ve (Gen.3:6). Zumtu tampi cu “ralchiatnak asilo ah ttihnak nih sualnak ah a kan hruai zungzal. Sifah ttih, min chiat ttih, midang ttih, thangchiat ttih tbk…ttihnak nih Pathian muisam kan lawhnak a hrawh caan a tam tawn.
Pathian nih cun ttih hlah! a kan ti(Isaiah 41:10, Joshua 1:9). Biatak, bia dik, thil hmanmi doh ngammi kan si a herh. Nathan nih siangpahrang David a sinak kong (2Samuel 12) kan rel tikah zeitluk in dah Pathian aa bochanmi zumtu hna an ral a tthat. Siangpahrang ttih a nung tukmi kha biatak le biahman ruangah a sik ngam i a cawnpiak ngam. Nathan zumhnak hi Pathian rianttuantu nih kan i cawn awktlak a si.
Atu kan chan ah mh le mah i thah a lar ngaingai. Mah le mah nunnak i lak cu mi ralchia taktak an si. An thih tikah vawlei nih a hngal hna lo. An thih ni in an tuanbia cu thangchiatnak in an donghter. Sihmanhsehlaw Zumtu tampi cu thil dik le thil hman le bia dik a chim ngam, a doh ngam, a tuah ngam ruangah an thih nain an thih ni in caan dong tiang vawlei nih an tuanbia dawh cu chim peng le rel peng an si.
Mi ral ttha nih an mah le mah an i thah bal lo. Mah le mah i that cu hrut le ralchia a si. Pathian pekmi nunnak sunglawi zeirello a si. Cucaah Khrihfa mi nih mah le mah nunnak i lak cu kan hrial hrimhrim awk a si.Thildik tanh ruangah thihngamh hi mi ralttha an si i, mah le mah nunnak i lak cu mi ralchia an si. Mi ralttha zumtu si i zuam cio hna usih Credit by Dr. Khar Ling.
Leave a Reply