Ralhrang Pawl Cu Taingen Khua Lei An Kai Hoi Ee

SAC Ralhrang Pawl Cu Taingen Khua Lei An Kai Ca Ah CDF CDM Siyin Nih Mizapi Sinah Ralrin Peknak An Tuah, Chin ramkulh, Tedim peng, Taingen khua lei ah Kalaymyo khuapi in SAC ralhrang 60 hrawng an rak kai caah lamthluan ah ummi tualchung mi hna cu a himnak hmun ah hrial ding in CDF CDM Siyin nih nihin January 17 ah ralrin peknak thawng an thanh. January 16 ah Tangai khua um SAC ralhrang sakhan laak kahdohnak a dih hnu ah chun hnu in SAC ralhrang pawl cu Kalaymyo in Chinram lei ah ke in an kai, tiah tualchung mi hna nih an chim. Kannih zong nih an rak kai timi thawng kan theih.

Thazaang 60 hrawng an si tiin an chim. Atu hi Hiangzing khua pawng um Coffee dum an phan cang. Cucaah tualchung mi hna cu an rak kai suallai ti an phang ngai i an himnak ding kan ruah caah kan hrial ter hna” tiah CDF CDM Siyin in ṭuanvo ngeitu pakhat nih Zalen ah a chim. Kahdohnak ruang ah Taingen khua, Suahlim, Bekant khua in tualchung mi 500 deng cu Hiangzing khua ah an i dor hna, tiah theih a si.

Taingan khua um SAC ralhrang sakhan laak kahdohnak cu Chin National Army(CNA), CDF CDM Siyin, CDF-Hakha, CDF-Thangtlang, CDF-Hualngoram, CDF Zanniatram, CDF KKG, PDA၊ TCDF ṭangṭi phu hna an si i 2024, January 16 zing ah tlamtlingte in an laak khawh tiah kan theih. Thawng dang relchap- Kyauktaw Peng, Kansauk Hrambunh 539 Battalion In SAC 300 Leng Cu AA Sinah An I Fonh, Rakhine ramkulh, Kyauktaw peng um Kansauk hrambunh SAC 539 Battalion in ralhrang 300 leng cu nihin January 16 ah Rakhine ralkap AA sinah hriamnam chiah in an i fonh, tiah Western News nih a chim.

Cu SAC Battalion cu Yangon-Sittwe motor lam pawng um Kansauk tlang pawng ah fek ngai in hram a bunhmi an si i, a pawngkam ah khua tam ngai zong a um pinah Kyauktaw khuapi he zong aa naih, tiah a langhter. Rakhine ralkap AA thawnglatu pakhat nihcun “Hriamnam chiah in aa fonhmi hi zeizat an si cu theih fiang a si rih lo. AA chungtel hna nih hri in an khih hna i an kalpi mi hna cu kan hmuh. Battalion pakhat ning in an si ko lai, ngakchia le nu pawl zong an tam ngai” tiah a chim.

An tlaihmi hna SAC ralhrang chungtel pawl cu AA nih a himnak hmun ah an chiah hna i an laakmi SAC Battalion umnak hmunhma chung ah zohfelnak an tuah pinah hriamnam tampi an laak, tiah theih a si. Aluan ciami January 11 in Rakhine ralkap AA nih Khah-mah-yiah 539 Battalion le No.377 miakpi ralhrang Battalion pawl cu an kahdoh hna i January 14 ah miakpi ralhrang umnak cu tlamtlingte in an laak khawh hnu ah a pawngkam um Khah-mah-yiah 539 Battalion in ralhrang pawl nih hriamnam an chiah hi a si.

AA nih an hriamnam chiah ding in an chimh hna. SAC ralhrang nih an duh lo caah kahdohnak faakpi in a chuak i ralhrang lei thimi an tam. AA nih hriamnam chiah ding in an au hnawh ṭhan hna i nu le ngakchia pawl an ṭap. Cu hnu ah ralhrang nih thantar rangmi an thlai i nu le ngakchia an i tel caah AA nih kahdohnak an ngol” tiah a chim chap. Cu pinah Minbya khuapi cu January 16 ah SAC ralhrang nih cunglei in pound 500 tluk a ritmi bomb a thlak i kap 2 kar kahdohnak zong a faak, tiah theih chih a si.

Leave a Comment

Leave a Reply

Your email address will not be published. Required fields are marked *