Chin ramkulh khualipi, Hakha ah ramṭhen dang in passport ser ding i Hakha passport sernak zung a rak fuhtu hna cu nizan October 12 khan kham rih an si, tiah tualchung mi hna sinin theih a si. Cuhlan ah cun Hakha passport sernak zung ah hin Chin ramchung mi hna pinah Sagaing le Magway ramṭhen chung mi hna zong passport serpiak an si tawn, tiah theih a si. Atu bantuk in Chin ramkulh leng mi hna ca ah passport ser khampiak an si ruang ah hin, Hakha khuapi ah passport ser aa timmi Chin ramleng mi cu harnak an tong, tiah theih a si.
Hmundang in a ra mi passport ser aa tim mi hna nih passport ser man ah Kyats 100,000 an pek i, booking tuahnak ah Kyats 20,000 pek a hau tawn, tiah passport a tuahtu hna nih an chim. Magway le Sagaing ramṭhen khua cheukhat um mi hna ca ah Hakha khuapi cu fuhpanh a fawi deuh ca ah ramleng chuah aa tim mi hna nih Hakha cu an rak panh tawn, tiah theih a si. Ramṭhen dang i a ummi hna passport serpiak an kham hnanak a ruang hi kan hngal ve lo, tiah passport ser ding mi a tawlrelpitu pakhat nih a chim.
Hakha passport sernak zung ah hin nifatin minung 100 hrawng nih passport an ser tawn, tiah theih a si. Thawng dang relchap- NCA Minthut Le Hnatlaknak Vialte A Rawk Dih Cang Tiin CNF, ABSDF le KNU Nih Phungning Tein An Thanh, SAC ralkap nih rammi cungah ngol loin thahnawnnak an tuah caah rampi remdaih hnatlaknak minthut le biahren vialte a rawk dih cang, tiah All Burma Students’ Democratic Front(ABSDF), KNU le CNF nih nizan October 12 ah phungning tein cathanh an chuah.
An cathanh chung ah, SAC nih nawlngeihnak an laak ruangah NCA minthut a rawh pinah 2008 phunghrampi a rawk ve i NCA minthut le rianṭuannak vialte a rawk dih cang, tiah phungning tein an thanh. Cu leng ah SAC ralkap nih rammi cung ah thahnawnak atu le tu a tuah i UN upadi zul loin thil an tuah. NCA minthut pehzulh in dirkamhnak le ceihmainak le a ra laimi 2024 thimnak tuah timhmi zong hi anmah nawlngeihnak caan saupi hmunhter an duh ruangah a si, tiah an langhter.
ABSDF, KNU le CNF nih ramkhel kong ah an hmuitinh an langhter mi cu SAC ralkap ramkhel ah i teltum ti lo ding, SAC ralkap cu sersiam ṭhan in mizapi nih thimmi cozah uknak tangah chiah ding, mizapi nih cohlan khawhmi Federal Democracy ah hram a bunhmi phunghrampi serchuah ding, ram buai lio chungah namneh mi hna nih tlukruannak an hmuh ding, dohthlennak chungah tlukruannak rian ser chuah ding le rian ṭuanchuah khawhnak caah ramkip nih telpinak, IT lei bawmhchanhnak, ramdang mi nih hlathlainak tuah le tangka in bawmhnak pek ding hna an si.
Cu pinah ABSDF, KNU le CDF nih ramkhel kong ah an dirhmun an langhter rihmi cu, SAC nih ramkhel kan hmuitinh an cohlan ko bu in rammi cung ah thahnawnnak an tuahmi an ngol hlei lo ahcun zei bantuk ceimainak hmanh an tuah ding sullam a um lo, tiah an thanh. Ramdaihnak ser lioah lungrualnak hrambunh in hmailei Myanmar ram cozah a siter khotu phunghrampi, thimnak upadi le dohthlennak lioah SAC cu nawlngeitu an si lonak an langhter. Ramkhel kan hmuitinh le kan dirhmun tlam a tlin hnu lawng ah Myanmar ram ah thimnak thar tuah khawh a si lai, tiah an cathanh ah cun an langhter.
Leave a Reply