Rampi Election 2020 Thimnak Lungput

Tukum 2020 thimnak cu kan naih cuahmah cang. Thimnak I aa cuh ding pawl zong anmah le sining, dirhmun cio ah tanlak in an chim an rel an phuan cio. Mah mithmuh ah a chia ahohmanh kan um lo bantukin mah mithmuh ah mah party cu a tha bik an si cio. Cucaah kanmah party kong kan chim tikah zei lei hoih in dah kan chim. Midang party chiatnak chim in maw kanmah party thatnak kan langhter lai maw asiloah kanmah party cu khua le ram caah cutin khatin kan tuah lai tiin tuah khawh dingah a fiang huaha lomi biakamnak in maw midang lungla ding in kan chim lai. Pakhat khat hi cu a si te men ko lai.

Zei party hmanh an si ah a bipi mi cu kan ram le miphun ca huap in rian a tuan kho ding kha mipi nih cun kan duh cio mi a si. Hi kong he pehtlaiin tuanbia pakhat tein ka hun langhter lai. Voikhat cu balloon zuartu pa nih balloon a zuar I a manh ti lo tikah a senmi kha cunglei ah a hei thlah I cu tikah hngakchia nih an hmuh tikah an duh tuk I a balloon cu an cawk dih. A thaizing ah cubantuk thiamthiam in a balloon aihre mi cu a thlah than i a balloon cu a manh dih than. A thaizing ah hngakchia nu nih mah balloon zuartu pa cu a angki in a tlaih I cawk a ka duh rua tiah a ruah nain a si lo. Hngakchia nu nih ka pu biahal kan duh. Mah balloon hi a nak mi tah van ah a zuang kho ve maw tiah a hal tikah a zuartu pa nih a lehmi cu, aw balloon hi a sen a nak a rang aihre tbt zeibantuk rong a si zongah a chung I a um ding thil (thlitu) a um paoh ahcun a zuang kho ko e tiah a leh.

Chim duhmi cu balloon bantukin kan rong kan party I dang liangluang hmanhseh a bipi mi cu kan chung I a ummi ram le miphun ca riantuan duhnak nganpi kan ngeih ding kha biapi asi ko. Mah bel mah tang huihnak zeilam tal in ka tuan chungah keimah caah zeizat dah ka ei khawh lai tibantuk a si lo ding kha bia pi a si. Cun pakhat mipi nih kan ruah chap ding le party I aa cuh ding pawl zong nih kan hngalh ding ah a bipi tukmi cu U Ba Maw (Geologist) pa vawileicung kum 100 chungah science lei a thiam bik minung 100 thimmi lakah aa tel vemi nih a chim balmi bia te hi kan ruahchih awk a herh ngai. A chimmi cu hlanlio ah Kawlram zeitluk in dah a rak that I a min a rak than, atu ah zei dirhmun ah dah kan dir timi kong a chimmi ah Bagan chan lio I Kawlram min a rak that tuk lio hrawng ahkhan America ram I New York khi khua te men men a rak si asinain a tu ahhin zoh law Kawl ram I khuapi bik Yangon khi America ram I a thangcho lo bik nak hmun he tahchunh law zeidah a lawh hnga a ti. Chim haulo khi asi. Kawlram ah a khuapi bik Yangon hmanh khi America ram I a thangcho lonak bik hmun he tahchunh ngam ding a si ti lo. Zeiruangah kan ti ahcun Kawlmi cu nawncek bantuk kan si lo thetse bantuk kan si caah asi a ti.

Mah party tanh ruangah midang party hnorsuan a hau lo. Midang party hnorsuan a hmangmi nih ram le miphun ca rian a tuan kho lai lo ti kha mipi nih kan hngalh fian a herh. Zeicahtiah midang chiatnak chim in mah thatnak langhter aa timmi cu mipi ca riantuan khotu an si ballo caah asi. A biapi mi cu kan I thimmi party chungin kanmah thim kan si ahcun kan ram le miphun ca huap in zei riantha dah kan tuan khawh lai ti tu kan I zuam ding a si I kanmah party thim kan si lo zongah ram le miphun caah kan ti khawhmi lam in thazaang chuah kan I zuam cio ding a si. Kan dirhmun cio ah nawn cek bang kan I funtom khawh ahcun a tha tuk hnga nain kan I fun khawh lo hmanhah thetse bantuk aa thekmi kan sinak hnga lo 2020 thimnak lungput kong siaherhnak he. Credit by Sui Len Tial.

Leave a Reply

Your email address will not be published. Required fields are marked *