NCA Kum 8 Tlin Camtuak Puai Kal Dingin RCSS Chairman Le KNU Chairman Hlun An I Thawh Cang, Nawlngeihnak latu SAC nih Naypyidaw ah NCA kum 8 tlin camtuak puai tuah an timh i Restoration Council Of Shan State(RCSS/SSA) Chairman General Yut Sit cu October 13 chun in Tachileik khuapi in a chuak cang, tiah theih a si. A ra laimi October 15 ah tuah dingin rampi kahdaih hnatlaknak NCA kum 8 tlin camtuak puai kal dingin RCSS/SSA Chairman lawng si loin.
KNU Chairman hlun zong Tachileik in aa thawh ve cang, tiah Tachileik News Agency nih a ṭial. Rampi kahdaih hnatlaknak minthut cu SAC nih an buar i NCA cu a rawh dih cang caah kannih CNF, KNU le ABSDF cu NCA kum 8 tlin camtuak ah kan kai ti lai lo, tiah fonhkomh in cathanh an rak chuah cang. Thawng dang relchap- Chin ramkulh, Tedim peng ah SAC ralkap nih nihin October 13 thawk in phone le internet line an phih, tiah tualchung mi hna nih an chim.
Tedim peng ah MPT, Ooredoo le Atom line pathum a ngah i October 13 in SAC nih an phih, tiah The Chindwin Post nih a langhter. Atom line a tlaunak a sullam cu fiang tein in kan hngal lo. October 10 lio zong ah Hakha peng ah MPT phone le internet line a rak tlau ve, tiah tualchung mi hna sinin theih a si. SAC ralkap faak piin a dohtu Chin ramkulh le Sagaing ramṭhen hmun cheukhat ah SAC nih phone le internet line atu le tu an phih.
A luancia September thla ah Sagaing ramṭhen hmun cheukhat ah line an rak on ṭhan. Cu ṭhiamṭhiam in October 12 zan suimilam 8:00 fai in Hakha ah Atom line cu SAC nih an phih i October 13 zanlei ah an on ṭhan. MPT phone le internet line zong October 13 zing in an phih i zanlei ah an on ṭhan, tiah Hakha ummi nih The Chin Post ah an chim. SAC nih phone le internet line an phih tawnnak kong he pehtlai in SAC nih biapi meeting an ngeih caan le pakhat khat thil tuah an duh caan ah phone line an phih tawn, tiin SAC he naihniam in a ummi hna nih an chim.
Leave a Reply