Rezua Sakhaan Laaknak Ah Pasaltha 4 Nih Ram Le Miphun Caah Nunnak An Pek

Rezua sakhaan laak Kahdohnak Ah Zapi Ralkap Ttangti Lei In 4 Nih Ram Le Miphun Caah Nunnak An Pek, Chin ramkulh thlanglei Matupi peng Rezua khuapi um SAC ralhraang sakhaan laak kahdohnak ah zapi ralkap ttangti phu lei in pasaltha minung 4 nih ram le miphun caah nunnak an pek tiah theih a si. Rezua sakhaan laak kahdohnak hi ZZLMS tiah min pek a si i ZZLMS chung ah hin Zotung,Zophei,Lautu,Mara le Senthang hna an si tel.

ZZLMS,CNA le CDF-Matupi battalion 2 hna ttangti in kahdohnak an kalpi hi a si i nihin November 29 zinglei slm 10:00 ah tlamtling in an laak khawh. Kahdohnak chung ah SAC ralkap 40 leng nih an hriam an chiah tiah theih a si i miphun le ram caah CDF-Mara in Salai Bawi Za Mang,CDF-Zotung in Salai San Law Tha ,CDF-Lautu in Salai David Thang (Le Le) le CNA in Salai David hna nih ram le miphun caah nunnak an pek tiah theih a si, crd-CBN.

Thawng dang relchap- Rezua Khuapi Cu Chin Ralkap Ṭangṭi Phu Nih An Laak, Chin ramkulh, Matupi peng, Rezua khuapi cu CNA hruaimi Chin ralkap ṭangṭi phu nih nihin November 29, zing ah an laak. Rezua khuapi SAC ralkap sakhan cu November 26 in CNA, CDF-Zotung, CDF-Zophei, CDF-Mara, CDF-Zophei, CDF-Lautu, CDF-Senthang, CDF- Thantlang le CDF-Hualngoram nih an kah i nihin November 29, zinglei suimilam 10:00 hrawng ah an laak khawh, tiah theih a si.

ZZLMS Operation min bunh in Chin ramkulh, Zotung hnunram, Rezua khuapi kahdohnak cu a luancia November 26 in kan rak thawk i nihin November 29, zinglei suimilam 10:00 hrawng ah kan laak khawh,” tiah CDF-Zotung in ṭuanvo ngei pakhat nih The Chin Post ah a chim. “Rezua khuapi cu a ning pi in Chin ralkap phu kut ah a um cang. Hriamnam zeimawzat zong kan laak khawh nain a zat belte hngalh a si rih lo.

Cun, kahdohnak kong he pehtlai in ralkap lei in thi le hliam zat hngalh thlu a si rih lo caah thawngfiang he tling deuh in thanh khawh ṭhan kan i zuam lai,” tiah CDF-Zotung in ṭuanvo ngei pakhat nih cun a chim. Rezua khuachung kahdohnak ah cun CDF-Zotung ralkap pakhat le CDF-Mara ralkap pakhat nih ram le miphun ca ah an nunnak an pek tiah, tiah a chim chap. CNA hruainak in Chin ramkulh chung khuapi cheukhat Surkhua, Hnaring, Makui Innu, Weibula, Rihkhawdar, Lailenpi le Rezua khuapi hna cu Chin ralkap ṭangṭi phu nih an laak khawh cang.

Leave a Comment

Leave a Reply

Your email address will not be published. Required fields are marked *