Nizan November 13 ah Rih khawdar um ralhraang sakhaan 2 cu chin hriamtlai ttangti phu hna nih an laak i hriam tam tak an laak. Ralhraang minung 43 mizoram chung a zam mi bel India Central cozah nih helicopter nih a laak hna i Sagaing ramthen Tamu ah a chiah than hna tiah theih a si. Photo,Rih khawdar ah laak mi hriamnam pawl. Thawng dang: Rakhine Ram Kahdohnak Ah Ralhraang 24 An Thi IB 344 In SBC telh in 11 A Nung In An Tlaih Hna,Palek 28 Nih Hriam An Chiah, Rakhine ram ah nizan November 13 kahdoh nak aa thok in ralhraang minung 24 an thi,
Infantry Battalion 344 in Second Battalion Commander telhin minung 11 a nung in an tlaih hna i palek minung 28 nih AA sin ah hriam an chiah tiah AA nih nihin ah phungning tein an thanh. November 13 Minpyia khua hmunhnih ah a chuak mi kahdoh nak ah sittwe hrambunh Second Battalion commander Major Thant Zin Htun,captain Phyo Zayar Hlaing hna telh in minung 10 hna cu anung in an tlai hna kong,cu kahdoh nak ah mit hmuh in ralhraang minung 10 an thi i hliam tuar zong an um tiah theih a si.
Cu bantuk thiam in November 13 ah Rakhine ram Yate-Taung,Maung-Taw le Min-Pyia khua hna i ralram hmun 5 ah kahdoh nak a um i cu ni lila ah Yate-Taung peng um Dung-Paih sakhaan cu an laak khawh i tuzing November 14 zinglei slm 7:00 tluk ah Ching-Kha-Li ralhraang sakhaan zong an laak khawh. Maung-Taw in a chaklei ralhraang Kalara 232 le AA kar ah kahdoh nak a chuak than i cu kahdoh nak ah ralhraang minung 14 an thi 1 a nung in an tlaih i hriam thilri zong tampi an laak khawh.cu kahdoh nak ah AA ralkap lei in minung 6 nih nunnak an pek ve.
November 13 ah Apauh-Wa palek sakhaan in palek minung 22 le hmundang in palek minung 6 an zapi palek minung 28 hna cu AA sin ah hriam an chiah tiah theih a si. November 13 nikhat chung Rakhine ramchung um ralhraang hna ramri hngahnak sakhaan,Palek sakhan hna telh in sakhaan 40 tluk an chuahtak i an mah he an i naihniam nak sakhaan hna ah le palek sakhaan 3 i a um mi hna kha sakhaan 1 ah an i fonh hna tiah theih a si.crd- CBN.
Leave a Reply