Chin ramkulh khualipi Hakha ah SAC nih phone le internet line an phih, tiah tualchung mi hna nih an chim. Zahan October 9 zan in MPT phone le internet line a ngah lo. Phone chawnh zong ah a ngah lo i internet zong a ngah lo. Pale in Gangaw lei kap ah SAC ralkap nih rallam an sial ruangah phone le internet line an phih maw a si hnga ti cu hngalh a si lo, tiah tualchung mi pakhat nih The Chin Post ah a chim. Voidang ah cun Hakha ah MPT phone line hi a pit bal lo tluk a si.
Nizan October 9 zanlei hrawng in a si cang men lai, MPT line a pit dih. Khat le khat i chawnh duh zong ah a ngah lo, tiah a chim chap. October 7 in Kalaymyo peng Sekan khua ah a lutmi SAC ralkap nih Sekan khua an khangh pinah khua mi zong an thah hna. Sekan khua lei i rallam an sial lio zong ah phone le internet line an rak phih dih, tiah theih a si. Nihin October 10 zinglei tiang ah Hakha ah MPT phone le internet line a ngah rih lo. Naite zong ah MPT line caan tlawmpal chung a rak rawk cang, tiah tualchung mi hna sinin theih a si.
Thawng dang relchap- Kalaymyo Ah SAC Nih Mei Man Khawlh Hram An Thawk Cang, Sagaing ramṭhen, Kalaymyo ah electric mei man cu SAC nih inn khat hnu inn khat lut in an khawlh cang hna, tiah tualchung mi hna nih an chim. Kalaymyo, Tahan sang ah October 1 thawk in mei man liam dingin. SAC ralkap le electric zung rianṭuantu hna nih sang chung mi hna cu an rak theihter hna i mei man a pe lo mi poh cu October 6 in mei an phihpiak hna, tiah tualchung mi pakhat nih Zalen ah a chim.
Mei man pek lo ruangah mei phihpiak a tongmi hna cu harnak an ton ruangah khuanu khuapa le zatlang bu hna nih pengkomh electric zung ah va kal in ceihmainak an ngeihpi hna, tiah theih a si. “October 22 a donghnak chia in thla 28 ca mei man nan pek dih lai. A pe lo mi poh cu nan meihri chahpiak dih nan si lai, tiin SAC nih tualchung mi hna cu an ti hna.
Electric mei fir a hmang mi hna nih metre box nanmah tein nan phongh ahcun zung ah metre nan rak sok ṭhan lai, nan sok ṭhan lo ahcun mi ṭha lo sual a tuahmi cazin ah khumh nan si lai, tiah SAC nih an chim. A luancia August thla ah Kyutungpin sang inn pakhat nih mei man an pek lo ruangah sangchung vialte cu SAC nih mei an rak phih dih hna. Sang upa le zatlang bu hna nih mei man an khawlh i an pek hna hnu lawng ah mei an ngei ṭhan, tiah sangchungmi hna nih an chim.
Leave a Reply