Rampi thimnak ca ah rammi milu cazin laak hneksaknak cu SAC nih October 1-15 tiang peng 20 ah an tuah lai i, Chin ramkulh khualipi Halkha zong ah an tuah ve lai, tiah theih a si. SAC nih milu cazin laak hneksaknak kan tuahnak peng hna cu Pathein, Mawlamyaing, Bago, Ralhine chaklei Maungtaw, Chin ramkulh khualipi Hakha le Sagaing ramṭhen khualipi Monywa peng ah a si, tiah an langhter. Hmun dang cu fiang tein an langhter rih lo. SAC nih an langhter mi hmanthlak ah milu cazin latu hna cu ralkap le palik nih humhimnak an laakpiak hnanak hmuh khawh a si.
Sagaing ramṭhen khualipi Monywa ah October 2 ah milu cazin a latu hna zong Nah Mah Khah uktu pa nih a va zoh hna. Milu cazin laak hneksaknak hi thimnak vote cazin ca ah a si. 2024 ah rampi milu cazin laaknak tuah a si lai i cu hnu ah thimnak tuah a si lai, tiah SAC ralbawi zik Min Aung Hlaing nih a chim. 2023 kum chung ah Yangon telh in hmun cheukhat ah SAC nih milu cazin laaknak an rak tuah i cu bantuk thil tuah cu lih le hrokhrawl thil tuah a si caah.
Mizapi cu i tel ve lo ding in le aa telmi cu ralhrang dohnak upadi in dantat nan si lai, tiah NUG nih an rak thanh,crd- The Chin Post. Thawng dang relchap- Min Aung Hlaing Le KNU Chairman Hlun Tonnak Kong Ah KNU Nih Cathanh An Chuah, Phungning loin nawlngeihnak a latu ralkap he ramkhel kong kan ceihṭi kho lai lo, PDF he i bawm in dohthlennak rian tu hmai kan kalpi lai, tiah KNU nih an thanh. “Ralhrang Min Aung Hlaing le KNU Chairman hlun phu tonnak an ngeihmi hi.
KNU karah hnahnawhnak thil chuahter le ṭangṭi hriamtlai phu karah i hmuh thiam lonak karhter ding thil tuah a si,” tiah KNU nih October 2 ah cathanh an chuah. September 30 ah KNU Chairman hlun telh in KNU-CEC hlun, Dupalaryar pengkomh Chairman hlun le Min Aung Hlaing cu Naypyidaw ah tonnak an ngei i cu ruangah KNU nih duhlonak cathanh an chuah. A voi 17nak KNU Conference a dih, 2023 August 10 ah tuahmi First 100 Days : KNU in NEW ERA thawngpang fianternak tuah lio zong ah hramhram in nawlngeihnak latu.
SAC he ramkhel kong ceihṭi lo dingin rak langhtermi a si cang, tiah KNU nih cun an thanh. Min Aung Hlaing le KNU Chairman hlun phu hna an i tonmi hi SAC nih KNU karah buaibainak chuak seh, ṭangṭi hriamtlai phu karah i hmuh thiam lonak karh seh ti an duh caah a si, tiah KNU nih cun an langhter. KNU Central Committee in Padoh Saw Taw Ni nih, “Min Aung Hlaing le KNU Chairman hlun phu an i tonmi ruangah mizapi thinphan lo ding, hi an i tonmi hna hi phungning tein a kalmi KNU he pehtlaihnak zeihmanh a ngei lo,” tiah Khit Thit Media ah a chim.
Leave a Reply