Chin ramkulh, Tedim peng ah SAC ralkap nih nihin October 13 thawk in phone le internet line an phih, tiah tualchung mi hna nih an chim. Tedim peng ah MPT, Ooredoo le Atom line pathum a ngah i October 13 in SAC nih an phih, tiah The Chindwin Post nih a langhter. Atom line a tlaunak a sullam cu fiang tein in kan hngal lo. October 10 lio zong ah Hakha peng ah MPT phone le internet line a rak tlau ve, tiah tualchung mi hna sinin theih a si.
SAC ralkap faak piin a dohtu Chin ramkulh le Sagaing ramṭhen hmun cheukhat ah SAC nih phone le internet line atu le tu an phih. A luancia September thla ah Sagaing ramṭhen hmun cheukhat ah line an rak on ṭhan. Cu ṭhiamṭhiam in October 12 zan suimilam 8:00 fai in Hakha ah Atom line cu SAC nih an phih i October 13 zanlei ah an on ṭhan. MPT phone le internet line zong October 13 zing in an phih i zanlei ah an on ṭhan, tiah Hakha ummi nih The Chin Post ah an chim.
SAC nih phone le internet line an phih tawnnak kong he pehtlai in SAC nih biapi meeting an ngeih caan le pakhat khat thil tuah an duh caan ah phone line an phih tawn, tiin SAC he naihniam in a ummi hna nih an chim. Ram leng thawng dang relchap- Gaza Khuapi Chung Ummi Hna Cu Gaza Khuapi Chuahtak Ding In Israel Nih A Theihter Hna! Israel ralkap lei nih cun Gaza khuapi chung ummi hna cu suimilam 24 chung ah thlanglei panh dih ding in a theihter hna.
Israel nih hin kahdohnak fak chin in tuah a timh caah raltuknak Tank a luhter lai kong nihin October 13 ah a thanh. Israel nih Hamas ralhrawng cawlcanghnak a lehrulh ruangah Gaza khuapi hmun cheukhat inn hna cu an ciam dih ti awk a si. Nizan tiang ah Drone le vanlawng in pehzulh in a kah rih. Hamas ralhrang hna cawlcanghnak ruangah Israel mi 1300 nunnak a liam cang, tiah Reuters nih a ṭial.
Israel ralkap lei nih cun, a ra lai mi ni tlawmpal ah a biapi tukmi kahdohnak kan tuah lai, tualchungmi hna cu kir caan kan thanh tik lawng ah nan kir te lai, tiah thawng an thanh hna. Israel nih Hamas a lehrulhnak ah Palestine mi 1500 hrawng nunnak a liam ve cang. “Gaza khuapi chung ummi vialte cu nan pumpak nunhimnak ca le nan chungkhar himnak ca ah chuak cang u, Hamas ralhrang he aa hlatnak hmun ah um u, Hamas ralhrang nih ralphaw ah an in hman hna.
Hamas ralhrang pawl cu Gaza khuapi vawlei tang le innchung ah an i duup i, mipi sinah an i cawh,” tiah Israel ralkap lei nih cun an chim. Hamsa lei nih mizapi cu Israel pawl ṭhihphaihnak i zumh lo ding in an ti ve hna. Israel vanlei kahdohnak ruangah an tlaihmi minung 13 cu an thi cang, tiah Hamas nih an thanh ve. Gaza khuapi cu Israel bochan in a nung mi a si i, Israel nih Electric mei, Dinti le a dangdang phihkhamnak a tuah hnu in an har a zual ngai cang.
Cucaah bawmhchanh an herh tuk kong vawleicung bawmchantu phu hna nih an chim. UNOCHA nih cun, Gaza khuapi um minung 400,000 hrawng nih an umnak hmun an chuahtak i, bawmhchanhnak a tuahtu minung 23 thah an si, tiah a langhter.
Leave a Reply