SAC Ralhrang Sakhan Cu AA Nih An Laak

Kyauktaw Hrambunh SAC Ralhrang Sakhan Cu AA Nih An Laak, Hriamnam Tam Ngai Zong An Laak Chih, Rakhine ramkulh, Kyauktaw hrambunh Khah-mah-yiah 374 Battalion SAC ralhrang sakhan cu AA nih nizan January 30 ah tlamtlingte in kan laak khawh i hriamnam tam ngai zong kan laak chih khawh, tiah Rakhine ralkap AA nih thawng an thanh. 2024, January 28 zong ah Minbya khuapi hrambunh Khah-mah-yiah 380 Battalion SAC ralhrang sakhan cu Rakhine ralkap AA nih tlamtlingte in an laak khawh cang. Rakhine ralkap AA cu Kyauktaw, Mrauk-U, Minbya khuapi hna ah a taang rih mi.

SAC ralhrang sakhan pawl zong laak dih dingin kahdohnak a tuah lio a si i, cu sakhan pawl cu kan laak khawh dih lai, tiah an langhter. Cu bantuk ṭhiam in Yanbye khuapi cu SAC ralhrang nih cunglei le hriamngan in an kah i Yanbye khuapi ah thazaang chap dingin an thlah mi SAC ralhrang pawl le Rakhine ralkap AA cu khuapi chung ah kap 2 kar kahdohnak a chuak i kap 2 thimi le hliamtuar an um. Cu kahdohnak ah SAC ralhrang lei in a thimi ruak, hriamthil cheukhat le nizan January 30 ah SAC ralhrang nih cunglei in hriamnam a chanh mi cheukhat cu Rakhine ralkap AA nih an laak khawh, tiah an langhter chih.

Kyauktaw, Mrauk-U, Minbya le Rathedaung khuapi um SAC ralhrang sakhan dihlak cu Rakhine ralkap AA nih pakhat hmanh taang lo in laak dih ding ah an luhhnawh i kahdohnak faak ngai in a chuak. Rakhine ralkap AA nih SAC ralhrang sakhan pawl cu pakhat hnu pakhat in a laak khawh hna, tiah AA nih thawng an thanh mi ah an langhter chih. Thawng dang relchap, Israel Le Hamas Misual Hriamtlaiphu Karlak Kahdohnak In Gaza Hmunram Cheu 2 Chungah Cheu 1 Cu A Rawk Cang.

December thla chungah Israel nih Gaza thlanglei hmunram le hmunlai cu cunglei raltuknak vanlawng hmangin a kah caah hlandang naak in khuasaknak Inn le hmunhma rawkmi a tam deuh, tiah an langhter. October 7, ah thok in Gaza hmunram i umhmun khuarmi Palestinian guerrilla group Hamas misual hriamtlaiphu cawlcanghnak in a chuakmi kahdohnak ah Israel nih cunglei in kahdohnak voi tampi a tuah caah tualchungmi hna umnak hmunhim zeihmanh a um ti lo, tiah theih a si.

Israel le Hamas karlak kahdohnak ah hin Gaza mizapi 1.7 Billion tluk cu hmunhimnak ah an zaam cang. Mizapi umnak inn lawng silo in, Gaza hmunram thlaihnah cinnak hmunhma le khuasaknak Inn tampi hna cu umnak ṭha ansi ti lo, tiah kan theih. Gaza hmunram chungah Inn a dir rihmi cheu 2 chungah cheu 1 hmanh a um ti lo anciam dih cang tiah, BBC nih a langhter. A tu Israel ralkap hi Khan Yunis khuapi hmunlai ah um in tualchungmi hna umnak hmunhma an kah lio a si, tiah Palestinian ralhrial pakhat nih a chim.

Leave a Comment

Leave a Reply

Your email address will not be published. Required fields are marked *