SAC Ralkap 23 An Thi, Meithal Zun 14 An Laak

Taze Khuapi Um SAC Ralkap Sakhan Kahdohnak Ah SAC Ralkap 23 An Thi, Meithal Zun 14 An Laak, Sagaing ramṭhen, Taze khuapi um SAC ralkap umnak Daungmin datsi dawr hlun le Lah Wah Kah zung cu September 22 zing suimilam 12:00-2:00 tiang PDF nih an kah i ralkap 23 an thi. Kahdohnak ah G3, MA1, MA2 le meithal zun 14 PDF nih an laak, tiah PDF nih Khit Thit Media ah an chim. “Taze khuapi um Lah Wah Kah zung, peng fimcawnnak zung, biaceih zung le Shwedaungmin datsi dawr ah umhmun a khuarmi.

SAC ralkap cu PDF nih September 22 zinglei suimilam 12:00-2:00 tiang hrawng kan kah hna i sakhan zong mei in kan khangh. Palik uktu chang 1, palik sergeant 3 telh in SAC lei minung 23 an thi. Meithal zun 14 zong kan laak,” tiah ral hmaikal PDF pakhat nih Khit Thit Media ah a chim. Kahdohnak a daih in Taze palik sakhan ah SAC ralkap motor 4 nih ralkap thazaang an chap. Kahdohnak lio ah SAC ralkap hriamngan kah mi kuan nih Taze khuapi um kum 5 tluk ngakchia nu pakhat cu a tlak i a nunnak a liam, tiah Taze khuami hna nih an chim.

Taze khuapi um sakhan kahdohnak ah hin military region No. 1, Shwebo pengkomh hruainak in Taze peng PDF hna he i bawm in an kah hna, tiah Khit Thit Media nih a ṭial, crd- The Chin Post. Thawng dang rel chap- Chinland Ukhruai Khawh Nakding Ah Chinland Constitution An Ser Cang Lai, Chinland Constitution ser ding in le mahte i uk khawh dingah Chinland Council ser zau ding in Working Committee for Chinland Council Conference(WCCCC) nih September 22 ah an thanh.

Chinland ukhruai khawh nakding ah Chinland Constitution ser ding in kan hna tla. Mahte i uk khawhnak ah a hrampi a simi upadi sernak, ukhruainak, biaceihnak hna hi kan ser lai. NUG ca zong ah tampi bawmchantu a si lai, tiah WCCCC in chimphuannak nawlngeitu Dr. Naing Tam Maung nih a chim. Dr. Naing Tam Maung nih Chinland Council ser ding le Chinland Constitution ser nakding meetting cu September 7-9 tiang ramri hmun pakhat ah kan tuah i CNF, Chin Hluttaw palai, peng le local hrambunh organization telh in meeting kaimi dihlak 108 kan si, tiah a chim chap.

Cu tonpumhnak ah cun Chin National Organization (CNO) le Zomi Feferal Union(ZFU) aiawhtu hna an kai kho lo. Chin ramkulh um organization dihlak sawm an si ko nain zatuak 80 lawng kan kai kho. Kan dihlak i tel khawh nakding zong kan i zuam lai, tiah Dr. Naing Tam Maung nih cun a chim. WCCCC hruainak in Chinland Constitution a hran ṭial ding kong cu 2023 a dih hlan ah tuah a si lai, tiah WCCCC nih cathanh an chuah.