SAC Ralkap 272 Cu MNDAA Cah An I Fonh Colh Cg

Laukkai Hmunram Ah SAC Ralkap Le Chungtel Minung 272 Nih Hriamnam An Chiah, Shan ramkulh chaklei, Laukkai Da-Kah-Sah kuttang Khah-Lah-Yah Battalion 125 in ralkap 93, Pyituhsit 27, palik 11 telh in minung 272 nih thantar raangmi thlai in hriamnam chiah i mipi sin ah an i fonh, tiah theih a si. MNDAA nih pehzulh in kahdohnak an kalpi i nizan November 28 ni ah Konekyan sakhan telh in ralkap sakhan pawl an laak khawh. SAC ralkap cheukhat le an chungkhar pawl le Pyituhsit phu telh in minung 270 leng nih an hriamnam an chiah.

November 28 ni tiang MNDAA nih Konekyan hmunram SAC ralkap sakhan 5 le umhmun an khuarnak pawl cu an laak dih, tiah theih a si. MNDAA nih tluang ngaiin kahdohnak an kalpi cuahmah ruang ah Khah-Lah-Yah Battalion 125 cu an battalion ningpi in hriamnam kan chiah cang ti langhternak caah thantar raangmi an thlai hnu ah ralbawi pakhat le ralkap pakhat cu MNDAA he tonnak an ngei i hriamnam chia in mipi sin an i fonh duhnak kong an chimh hna.

MNDAA nih hliampu cheukhat le an chungkhar hna cu an tuamhlawm hna, cu hnu ah kaphnih kar hnatlaknak an ngeih bantuk tein ralbawi pa nih a naule cu an dihlak in a auh hna i MNDAA sin ah hriamnam tling he an i fonh. Cu ralbawipa nih cun SAC ralkap Sah-Khah-Yah 16 ralbawi pakhat nih ralkap 100 leng cu November 27 ni ah a zaampi dih hna, tiah a chim. Hriamnam he mipi sin aa fonhmi hna cu; Pyituhsit 27, Khah-Lah-Yah Battalion 125 in 93, Sah-Kah-Khah 16 in 36, Sah-Kah-Khah 12 in 14, an chungkhar minung 86, kahdohnak kong ah ruahnak petu 5 le palik 11 hna an si i an dihlak ah minung 272 an si.

Cu pin ah hmunram thianhfelnak an tuah lioah SAC ralkap an tlaih chapmi pawl zong an um, tiah theih a si. Thawng dang relchap- Rezua Khuapi Cu Chin Ralkap Ṭangṭi Phu Nih An Laak, Chin ramkulh, Matupi peng, Rezua khuapi cu CNA hruaimi Chin ralkap ṭangṭi phu nih nihin November 29, zing ah an laak. Rezua khuapi SAC ralkap sakhan cu November 26 in CNA, CDF-Zotung, CDF-Zophei, CDF-Mara, CDF-Zophei, CDF-Lautu, CDF-Senthang, CDF- Thantlang le CDF-Hualngoram nih an kah i nihin November 29, zinglei suimilam 10:00 hrawng ah an laak khawh, tiah theih a si.

ZZLMS Operation min bunh in Chin ramkulh, Zotung hnunram, Rezua khuapi kahdohnak cu a luancia November 26 in kan rak thawk i nihin November 29, zinglei suimilam 10:00 hrawng ah kan laak khawh,” tiah CDF-Zotung in ṭuanvo ngei pakhat nih The Chin Post ah a chim. “Rezua khuapi cu a ning pi in Chin ralkap phu kut ah a um cang. Hriamnam zeimawzat zong kan laak khawh nain a zat belte hngalh a si rih lo.

Cun, kahdohnak kong he pehtlai in ralkap lei in thi le hliam zat hngalh thlu a si rih lo caah thawngfiang he tling deuh in thanh khawh ṭhan kan i zuam lai,” tiah CDF-Zotung in ṭuanvo ngei pakhat nih cun a chim. Rezua khuachung kahdohnak ah cun CDF-Zotung ralkap pakhat le CDF-Mara ralkap pakhat nih ram le miphun ca ah an nunnak an pek tiah, tiah a chim chap. CNA hruainak in Chin ramkulh chung khuapi cheukhat Surkhua, Hnaring, Makui Innu, Weibula, Rihkhawdar, Lailenpi le Rezua khuapi hna cu Chin ralkap ṭangṭi phu nih an laak khawh cang.

Leave a Comment

Leave a Reply

Your email address will not be published. Required fields are marked *