Saw Peng Ah SAC Ralkap Nih Phungki Pakhat Le Chin Nu Pakhat Ralphaw Ca Ah An Tlaih Hna, Magway ramṭhen, Saw peng San khuami phungki pakhat le ralhrial Chin nu pakhat cu SAC ralkap nih ralphaw ca ah an tlaih hna tiah tualchung mi nih an chim. Nihin March ni 29, chunhnu ah tlaih a tongmi nu hi Mindat pengmi a si tiah ralhrial camp ah aa dormi hna he naihniam in ummi pakhat nih a chim.
Saw peng Pansan khua in a chuakmi SAC ralkap hna cu nihin March ni 29 ah Tay khua an phan i phungki sianginn le tualchung mi hna an umnak inn ah umhmun an khuar, cu hnu ah San khua a phanmi SAC ralkap 80 hrawng cu nihin March ni 29, zinglei ah San khua thlanglei hoih in an chuak tiah tualchung mi nih an chim. SAC ralkap nih rallam hmun hnih in an sial caah tualchung mi hna zong a himnak hmun ah an zaam hna tiah theih a si.
Khualu ah ummi phuki pakhat le ralhrial Chin nu pakhat cu SAC ralkap nih ralphaw ca ah an tlaih hna, hmaisuang ah an kalter hna tiin kan theih” tiah tualchung mi pakhat nih amah social media ah a langhter. Saw peng tualchung mi pakhat zong nih San khua phungki pakhat le ralhrial nu pakhat tlaih an tonnak kong cu a dikmi a si ko tiah a chim ve. San khua phungki le ralhrial camp ah aa dormi.
Chin nu a tlaitu SAC ralkap hna hi Pakokku hrambunh ṭatmah 101, Gangaw hrambunh khahlahyiah 50, Kyaukhtu hrambunh ah-mah-ṭah 368 le Mindat hrambunh khahlahyiah 274 in an si tiah theih a si. SAC ralkap hna hi Mindat-Magway kar Htinchaung, Kyatutin, San, Dae khuachung ah March ni 24 in umhmun a rak khuar cangmi an si. Tlaih a tongmi phungki le ralhrial Chin nu pakhat cu Kyaukhtu hrambunh SAC ralkap camp ah an kalpi hna tiah zumh a si, tlaihkhih an tonnak kong ah PDF he pehtlaihnak nan tuah tiah.
SAC ralkap nih an puh hna caah an tlaih hna tiah micheu nih an chim nain, cu kong ah biafiang theih a si rih lo.crd- The Chin Post. Thawng dang relchap- Yephyu Peng Ralvengtu SAC Ralkap Kahdohnak Ah 3 An Thi, 5 Hliamhma An Pu, Tanintharyi ramṭhen, Dawei pengkomh Yephyu peng Kanpauk hmunram ah March ni 27 ah Mawyawaddy ti-ralkap sakhan in ralven ding ah a chuakmi SAC ralkap cu hriamngan in PDF nih an kah hna caah 3 an thi, 5 hliamhma an pu tiah tualchung mi hna nih an chim.
Mawyawaddy ti-ralkap sakhan in a chuakmi leilawng cu March ni 27 zing suimilam 6:30AM ah Yephyu peng Kalingaung-Kanpauk lam ah bomb in an puahhnawh, tiah tualchung mi pakhat nih a chim. Mawyawaddy sakhan in ralven ding ah a chuakmi SAC ralkap leilawng hi 4 an si i, a hnu bik a kalmi 2 cu bomb in an puahhnawh hna. SAC ralkap ruak an putmi hna zong kan hmuh hna. Hliamhma pumi zong an tam ngai, mizaw phurhnak leilawng nih a kalpi hna, tiah mithmutu pakhat nih an chim.
Kaphnih kar kahdohnak minutes 15 chung hrawng a chuak i bomb a puah hnu ah SAC ralkap nih mi chokkvai hna cu chekhlatnak ṭha tein an tuah hna, tiah theih a si. A luancia 2022 May 7 lio zong ah Mawyawaddy sakhan in a chuakmi SAC ralkap cu hriamtlai phu nih Kalingaung No. 2 hlei pawng ah bomb in an rak puahhnawh hna i, ralkap 4 an rak thih pin ah 6 hliamhma fak ngai an rak pu cang.crd- The Chin Post.
Leave a Reply