SAC Ralkap Pawl Cu Timit Hlei Remh Ṭhan Ding In An I Zuam Len Nain An Hlawhtling Lo

Chin ramkulh, Hakha-Thantlang lampi ah a ummi Timit tiva hlei cu remh ṭhan ding in, SAC ralkap pawl cu an i zuam len nain remh an timnak thla khat le cheu hrawng tiang ah an remh kho rih lo. SAC ralkap nih Timit tiva hlei remh ṭhan an timh ruang ah le, Thantlang camp thazaang chap an timhnak ah lampi ah kahdohnak tuah. Timit lam hi Hakha le Thantlang kar pehtlaihnak ah hman bik mi lampi a si caah Timit hlei a rawh hnu in,

SAC ralkap hna nih Hakha le Thantlang kar pehtlaihnak an tuah khawhlonak a sau ngai cang. Timit hlei remhnak ding ca ah thilri phortu motor 27 cu June 29 ah Kalaymyo in an rak chuak nain, lampi ah tualchung ralkap hna nih voi tampi an kahdoh hna. Timit hlei pawng ah hin Chin ralkap; CNA, CDF-Zophei, CDF-Hakha, CDF-Thantlang, CDF-Lautu, CDF-Mara le CJDC phufonh nih an kahdoh hna i, SAC ralkap lei fak ngai in an hliamh hna, tiah theih a si.

SAC ralkap hna nih 2021 ah Thantlang khuapi cu an rak khangh i, kahdohnak ruang ah Hakha le Thantlang pehtlaihnak lampi Timit hlei cu tualchung hriamtlai phu nih an rak hrawh. Chin ralkap hna nih Timit hlei an rak hrawh lio ah cun hlei kap khat lei lawng a rak rawk i, 2022, July 28 ah tualchung hriamtlai phu nih a voi hnihnak an hrawh ṭhan caah Timit hlei cu kap hnih in a cim, tiah theih a si. Crd- the chin post.

Thawng dang: Sagaing ramṭhen, Pale peng khuate cheu khat a khaangtu SAC ralkap le PDF cu August 13 le 14 ah an i kap i, SAC ralkap 22 hrawng an thi, tiah M.R.D.A. phu sinin theih a si. August 13 zanlei sml 2:12 hrawng ah Wyathit khua tlaklei ah rallam a sialmi SAC ralkap cu M.R.D.A. phu nih lamhruang in an bawh hna i, an kah hna caah SAC ralkap 3 an thi, tiah theih a si. August 14 zanlei sml 1:20 hrawng ah Pahtuthar khuathar inn khaangtu SAC ralkap pawl cu Kabaryet khua pawng ah M.R.D.A phu nih an kah ṭhan hna caah.

SAC ralkap 5 hrawng an thi, tiah theih a si. Cu ni zanlei sml 6:00 hrawng in kahdohnak a chuak ṭhan i, SAC ralkap 14 hrawng an thi. M.R.D.A lei in ralkap 5 an nunnak a liam ve. Cu kahdohnak ah M.R.D.A, Yinmarbin pengkomh Battalion 1, Royal Eagle, Pale Joker phu le ṭangrual PDF hna i bawm in an kah hna, tiah theih a si. Rallam a sialmi SAC ralkap nih Pale peng khuate hna cu an khangh pinah August 13 le 14 kahdohnak i a thimi ralkap hna ruak cu,

Inn ah an pon hna i mei in an khangh hna, tiah theih a si. Yesagyo peng khuate a khaangtu SAC ralkap pawl cu August 13 le 14 zanlei sml 3:00 hrawng ah PDF nih kan kah hna i, ralkap 8 nak tlawm lo an thi, tiah PDF sinin theih a si. Magway ramṭhen, Myaing peng Teykyi le Neytat khua karah riahcaw chantu SAC ralkap motor 2 cu, nizan August 15 zanlei sml 1:17 ah Myaing peng PDF nih voihnih bomb kan puahhnawh hna caah ralkap 3 an thi, tiah Myaing PDF nih an langhter. Crd- the chin post

Leave a Reply

Your email address will not be published.