SAC Ralkap Sakhan 40 Leng Kan Laak Cang Tiah AA Nih Thanh

Rakhine ramkulh ah SAC ralkap sakhan 40 leng kan laak khawh cang, tiah Arakan Army(AA) nih nizan November 22 ah an thanh. November 13 -22 tiang SAC ralkap sakhan 4 kan kah i kan laak khawh pinah sakhan 40 leng kan laak khawh cang, tiah an langhter. Pauktaw khua ah SAC ralkap nih ralphaw ah an tlaihmi khuami 100 deng zong November 21 ah AA nih an chanhchuah khawh hna. Pauktaw khuapi cu AA nih luhhnawh an timh caah tualchung mi hna cu an ṭhawl hna tiin SAC chimphuannak nawlngeitu Zaw Min Htun nih a chimmi cu nihin.

November 23 ah SAC kuttang Myanwaddy News nih a langhter. Rakhine ramkulh ah November 13 in SAC ralkap le AA kar kahdohnak a chuak ṭhan i SAC ralkap nih hriamngan an kah ruangah chungkhar 4700 leng, minung 26,000 leng an zaam, tiah UNICHA nih November 17 ah an rak langhter. Maungtaw, Myo U, Kyauktaw, Ann peng ah SAC ralkap nih hriamngan an kah ruangah tualchung mi 11 an thi i 30 leng hliam an tuar, tiah UNOCHA nih cun an langhter.

Cu pinah Rakhine ramkulh peng tampi ah ti lam le tlang lam cu SAC ralkap nih November 13 thawk in an rak kham i bawmhnak pekmi zong ngol chung a si. Thawng dang relchap- Lailenpi Khua SAC Ralkap Sakhan Cu CNA Le CDF Ṭangṭi Phu Nih An Laak, Chin ramkulh, Matupi peng chung Lailenpi khua cu Chin hriamtlai phu CNA le CDF ṭangṭi phu nih nihin November 24 zinglei ah an laak khawh, tiah theih a si.

A luancia November 19, zanlei ah Lailenpi SAC ralkap sakhan cu CNA, CDF-Thantlang, CDF-Mara, CDF-Matupi, CDF-Lautu le CDF-Zophei ṭangṭi phu hna nih an kah. SAC ralkap nih vanlawng in kahdohnak an tuah ruang ah Chin ralkap phu hna nih ni 4 a rauh hnu ah an laak khawh. SAC ralkap pawl nih vanlawng an hman ruang ah Lailenpi khua mi 4 nunnak a liam i, Biakinn le sianginn telh in inn 10 hrawng a rawk dih.

Lailenpi SAC ralkap sakhan laaknak kong he pehtlai in CNA in ṭuanvo ngei pakhat nih cun, “Ralkap pawl nih sakhan cu an chuahtak dih, hriamnam cu an i zaampi dih nain meital kuan belte cu tam ngai kan laak khawh,” tiah a chim. Cu sakhan kahdohnak ah cun SAC ralkap bawi pakhat Soe Win Theik a thi, tiah CHRO nih an langhter ve.

Leave a Comment

Leave a Reply

Your email address will not be published. Required fields are marked *