Sakhan Laak Kahdohnak Ah SAC 11 An Tlaih Hna, 70 Leng An Thi

Pekon Palik Sakhan Laak Kahdohnak Ah SAC 11 An Tlaih Hna, 70 Leng An Thi, Shan ramkulh chaklei, Pekon khuapi kahdohnak lio ah SAC ralhrang chungtel 70 leng an thi i hriamnam 60 leng zong an laak khawh chih, tiah ralram thawnglatu pakhat nih a chim. “January 7 in 11 tiang, ni 5 chung kahdohnak caan chung ah SAC nih cunglei le hriamngan in a kah bawmh caah kap 2 kar kahdohnak faak ngai in a chuak i cu kahdohnak ah SAC ralhrang 11 zong mipi ralkap nih an tlaih hna pinah Pekon khuapi um palik sakhan zong an laak chih” tiah Burma VJ ah a chum.

Pekon khuapi um siangsangrun No.1 sang hnulei ah SAC ralhrang nih umhmun an khuarnak sakhan cu Pekon tualchung hriamtlai phu hna nih luhhnawh in an kahdoh caah kahdohnak a faak i Konehson khua pura umnak hmun le phungki sianginn zong ah kap 2 kar kahdohnak a faak ve, tiah theih a si. “Khuapi chung kan luh lio ah SAC ralhrang pawl nih an sakhan an chuahtak i Battalion hna simi 336, 421 Battalion in SAC kuttang um No. 7 miakpi ralhrang hna an umnak lei ah hnulei an tolh.

Kahdohnak a faak biknak hmun cu Pekon khuapi pawng um Konehson khua pura umnak le phungki sianginn 2 ah a si. Cu kahdohnak ah SAC ralhrang hriamnam 60 hrawng mipi ralkap nih an laak khawh i ralhrang 70 leng an thi pinah 11 an tlaih hna” tiah a chim chap. Thawng dang relchap- Mindat Khuapi Ah Phungki Le Tualchung Mi, SAC Ralhrang Chungkhar Hna Nih Duhlonak An Langhter, Myanmar ram Buddhist a biatu hna nih an biakmi pura hrawktu hna cu faakpi in kan doh hna tiah, January 12 ah Mindat khuapi ah duhlonak an langhter.

Duhlonak a langhtertu hna lak ah phungki le tualchung mi cheukhat an i tel i SAC ralhrang Khah-lah-yiah 274 Battalion pawngkam hna ah an i pum hna, tiah The Mindat Post nih a langhter. Aluan ciami January 8 ah Myanmar National Democratic Alliance Army(MNDAA) ralthuam aa hrukmi mino pakhat nih sobul in pura a tuk lio video cu Social Network ah hmuh a si i SAC ralhrang nih nitlaklei unau thum hna phu hi biaknak lei thil ruhrang á¹­uanmi an si tiin an puh hna hnu ah atu bantuk in duhlonak an langhter mi cu hmuh a si, tiah a langhter chih.

Hi kong he pehtlai in cu mino nihcun amah pumpak in a tuahmi a si i Kokang ralkap tlamtlin lo ruang ah a si, tiah MNDAA nih ngaihthiam halnak cathanh an chuah. SAC ralhrang nih nawlngeihnak a laak thok in kum 2 leng caan chung ah cunglei kahdohnak a tuahmi ruang ah biaknak lei inn 80 tluk deng a rawk cang, tiah NUG cozah nih 2024, January thlachung ah thawng an thanhmi in kan theih.

Leave a Comment

Leave a Reply

Your email address will not be published. Required fields are marked *