Chin miphun cu dothlennak Lamthluan ah a kal cuahmah mi kan si rih, Zalennak kan hmu rih lo.
Chin miphun pasaltha CNF nih Hriannam he dothlennak an tuah cuahmah ve bantuk in hriamtlai lo Chin mipi zong nih a lamkip in dothlennak lamthluan ah luh le cawlcangh cio a herh peng ve rih, Ramkhel Party in cawlcanghnak, Hriamnam in cawlcanghnak tibantuk a lam kip in tuancio a herh peng rih.
2008 phunghram an remh hnu lawng ah Chin Miphun Party ka dirkamh te lai timi ruahnak hi kei ka fian ning ahcun Dothlennak a dih hnu, zalennak, covo puitling kan hmuh dih hnu ah Chin mipi kan dirkamh te hna lai ti he aa khat. Dothlennak lamtluan tu ah hin kan i dirkamh a herh, a dih hnu ahcun dirkamh a hau ti hnga maw?
CNF an si zong ah, Chin Miphun Party an si zong ah atulio hi dirpi caan a herh lio, lungrual tein dothlennak kan tuah caan cu a si. Kan ram, kan vawlei cu kan mah tein kan tawlrel ve ko lai timi hi Kawl hruaitu nih sin ah tuahsernak in kan langhter a herh. Cucu tuahsernak in langhter caan cu rampi election hi asi.
Chin mipi dihlak nih Miphun Party kan vote dih ahcun, mah tein uk kan duh ve cang tiah Kawl hruaitu hmai ah sandah kan piah bantuk a si tiah ka hmuh ning a si. Chin miphun dihlak nih lungrual tein sandah piahnak caan ttha cu 2020 rampi thimnak hi a si. Chin Miphun Party ah vote kan sanh dih ahcun lungrual tein sandah kan piah a si ko.
Union of Burma a dirhtu, Founder cu kan si ve kan ti nain a dirhtu sinak le Covo puitling cu teh kan ngei maw? Vice President sinak an kan pek i kan i lawmtuk kan ti, pek ve, timi si loin Union of Burma a dirhtu taktak ah an kan pom ahcun President zong a ttuan ve ding khi kan si.
Chin miphun Party nih zeihmanh an tuah kho lai lo timi ruahnak hi, Chin mi cu zeihmanh kan si lo, Kawl tu ah i benh peng ko hna usih timi lungput a si.
Credit: Salai Cung Dawt
Leave a Reply