Raldoh Pah In Chinland Council Dirh Ding In Timhlamhnak Kan Ngei, Atu lioah cun raldoh pah in Chinland Council dirh khawh nakding ah timhlamhnak kan ngei, tiah CNF chimphuannak nawlngei Salai Htet Ni nih Global Chinland Club tonbiaruahnak ah a chim. Mahte khuakhan lairelnak ngeih khawh nakding ah a biapi bik cu ralkap thazaang ṭhawn hmasa a hau. Ralkap nih amah hmunram a zohkhenh khawh lo ahcun a lak men a si. Arakan Army nih Paletwa cu kan ram a si a timi tehna.
Kawl ralkap nih Mindat i Shweaungthar cu kan hmunram an timi tehna hi an ralkap thazaang ṭhawn ruang ah a si, tiah Salai Htet Ni nih cun a chim. Cu ruang ah kan hmunram ukpen khawh nakding ah cun ralkap thazaang ṭhawn a hau, CDF zong nih One Command tang um ding in an i zuam i an i fonh cuahmah, tiah Salai Htet Ni nih cun a chim. Chinmi hmunkhat ah i fumtom in rianṭuanṭinak ah aa fonh kho lomi an um zong ah a lung aa rualmi cu hmainor in kal a herhnak kong.
Aa fonh kho rih lomi hna zong dohkalh lo in lam kaupi in onpiak an sinak kong, aa fonh kho lomi zong nih mahle hmunram an zohkhenhnak kong le hnutolh lo in hmainor in kal an herhnak kong cu CNF chimphuannak nawlngeitu nih cun a chim. Salai Htet Ni nih cun, atu caan ah ral kan tei khawh nakhnga Chinmi nih lungrual kan herhnak kong cu kan chim a tam ngai nain a tak ah kan tha a der, Chinmi dihlak i funtom in a tak in langhter ding caan ṭha a si caah kan zapi in ṭuanṭi caan a phan cang, tiah GCC tonbiaruahnak ah cun a chim.
Chin Council kan dirh khawh nakhnga ca ah tiin ICNCC dirh a si ko nain a tlamtlin deuh lo caah CNF cu kan rak chuak. A thar in Chinland Council dirh ṭhan ding ah CNF nih kan hruai hna i Chinland Council phunghrampi a hran zong kan ṭial dih cang, tiah CNA in ralbawi Solomon nih a chim ve. Chinland Council dirhnak ding tonbiaruahnak cu September thla chung ah tuah a si i rianṭuantu committee zong thim dih an si cang. Cu tonbiaruahnak ah cun phungphai zeimaw ruang ah.
Chin hriamtlai phu a simi CNO/CNDF le Zomi Federal Union(ZFU) hna an i tel lo, tiah theih a si, crd- The Chin Post. Thawng dang relchap- a Ra Laimi November Thla In Hakha Khua Chung Ah City Bus Aa Chawk Ṭhan Cang Lai, Chin ramkulh khuapi Hakha khua chung ah a ra laimi November 1 cawn nithum ni in City Bus cu a chuak ṭhan cang lai, tiah theih a si. City Bus aa chawh ti lonak hi thla 8 hrawng a si cang. Tualchung mi hna nih City Bus chuah ṭhan dingin an kan nawlnak tete a um pah.
Meeting kan tuah i a ra laimi 2023 November 1 thawk in Hakha khua chung ah i chawk ṭhan dingin biachahnak kan ngei, tiah HBA ṭuanvo ngeitu pakhat nih The Chin Post ah a chim. “City Bus hi 2015 Hakha mincimh lio in hartong mi bawmhchanhnak ca ah bawmhnak pekmi a si i cu hnu ah Hakha khua chung ah kan chawhter. 2016 thawk in 2023 tiang Hakha khua chung aa chawhnak ah a miak zeihmanh kan hmu lo. A sungh lei lawngte a si,” tiah a chim chap.
Hakha khua chung a rak i chawhka ah cun minung pakhat cit man kyats 500 kan rak laak hna i diesel man a kai tuk ve caah 1,000-1,500 tiang kan kai. Man fawite le a miak hmu loin a sung in rian kan ṭuanmi hi mizapi ca ah ṭhahnem santlai ngaingai a si. HBA zung in Hakha thar tiang taxi le tungbing hlan ahcun hlan man a tam ngai nain kannih cu minung pakhat ah kyats 1,500 lawng kan laak lai, tiah HBA in ṭuanvo ngeitu pakhat nih cun a chim.
Bus chuah caan hi zing suimilam 8:00Am – 9:00Am kar, HBA – Hakha Thar (Lam ruk tonnak pawng) tiang a kal lai. Zanlei suimilam 3:00Pm – 4:00Pm, HBA – Hakha Thar(Lam ruk tonnak pawng) tiang a chuak ṭhan lai, tiah theih a si. City Bus cit a duhmi nih hngahnak hmun cu Kyaw, Ral Dun bazar(Dawrthar), zungkip fonh zung hmai, Hluttaw zung pawng, Golf tuknak lamṭhen, Khuathar Carson Biakinn pawng le Hakha-Thantlang lampial in hngah khawh a si, crd- The Chin Post.
Leave a Reply