Salai Lung Thli Tum Cu Pu No Than Kap Sining A Tial Ruangah Ralrin Pek A Tong

By; Salai Lung Thli Tum: Zeitindah CNLD chairman Pu No Than Kap a sining le a luancia tuahsernak kong na tial ngam? Na tih lo ma? An thah sual lai dakaw’ tiah mi tampi nih ralrin an ka pek, Hakha le Thantlang ka vahnak ah ralrin pek a tam khun. Zawnruahnak lungthin he ralrin aka pemi zong an um i thihphaih duh ah warning aka pemi zong an um ve.

Mino te a simi keimah zong thah a ngamh ko lai, thah a duh ko lai tiah nan ruah i nan tihmi pa cu maw kan Chinram hruaitu ding ah thim nan duh i nan timh? A hruaimi party CNLD dirhkamh le vote pek cu indirect in amah vote pek bantuk a si i amah CM si khawhnak lam sial piak bantuk a si timi nan thei lo maw?” tiah ka leh theu hna.

Party pakhat mee kan pek tikah kan duh zong duh lo zong ah indirect in party hruaitu mee kan pek a si, NLD vote na pek ahcun an hruaitu Suu Kyi or Lian Luai vote pek bantuk a si i CNLD vote pek ahcun an chairman Pu No Than Kap, Pu Ngaisak le Pu Zozam vote pek bantuk a si ve. Mipi kan lungfim i kan i fian ngai a hau.