2020 thimnak ah Thantlang peng Pene No. 2 meehmun ah Independent in aa cut dingmi Salai Lungthli Tum nih a mee hmun khua kip in amah a bawmhtu ding minung 12 a herhnak cu tu naite ah khan a facebook ah a tanglei bantukin a tarlangh.
“Keimah meehmun khua kip ah teinak committee chungtel 12 cio ka herh, Thantlang Lungtial sang le Saihpiozii sang telh in. Hmailei kum 40 tiang keimah he naihniam ngai in ram le miphun caah rian kan tuanti hna lai. Pehtlaih nak ding 09752558135.”
Salai Lungthli Tum cu kum note a si nain a ngeihchiah zong nih a tling i thil ti kho ngaimi a si. Mino te a si nain mi thinlung a hip kho hi amah a uartu zong an tampi cang tiah a facebook ah a catialmi an comment ning in theih khawh a si.
Salai Lungthli Tum cu Party chungtel si loin Independent in aa cuh dingmi a si tikah zeihmanh a tuah kho lai lo tiah a soiseltu zong an tampi ve. Cucaah MP a tling ahcun amah pumpak phaisa hmang in Chin ram thanchonak tuah ding aa timhmi kong cu a luancia September 18, 2020 ni ah a tanglei bantukin a rak tial.
“Party pawl nih ‘Lungthli Tum cu independent a si caah zeihmanh a tuah kho lai lo, nan lampi zong an cawh piak kho hna lai lo’ tiah khuate tampi ah an chim. Kei cu anmah bantuk in ka tuah khawh dingmi ka chim tuk rih lai lo, pakhat te lawng ka chim ko lai.”
“MP ah nan ka thim ahcun Aizawl ah keimah pumpak phaisa hmang in lam cawhnak seh JCB ka cawk lai i keimah aka tanpitu khuate kip lampi free in ka cawh piak hna lai, diesel le datsi man belte a pe khomi khua nih an pek te lai. Mah te hi cu vuanci tuan thengte a hau lo, fawi tuk in midang bawmh hal hau loin ka tuah khawhmi a si ko.”
Tu lio cu thimnak a nai taktak cang tikah MP a tlin khawhnak hnga, a meehmun khua kip in a bawmtu ding minung 12 cio a herhnak a van tarlangh than hi a si. A chim bangin a tuah tawntu a si tikah MP a tling ahcun tutan a bawmtu hna zong kum 40 chung riantuanti khawhnak caantha an ngei lai tiah sawmnak a tuahmi ning in theih a si.
Source: Salai Lungthli Tum
Leave a Reply