Salai Lungthli Tum cu tu lio CLND upa Pu No Than Kap a soisel bik tu kan ti ahcun kan palh lem lai lo tiah ka ruah. Pumpak in a soiselnak ca a tialmi hi a voi a tam ngai cang.
Nihin zong Salai nih Pu No Than Kap soiselnak ca a tial than minung tampi nih comment an tial ve. Nain amah Salai Lungthli Tum pumpak hrimhrim MP aa cuh ve ding a si tikah micheu nih a tialmi a dik an ti lio ah micheu nih cun MP aa cuh dingmi pakhat nih hi bantukin minung pumpak i soisel cu a tha lo a ti tu zong an tlawm ve lo.
Comment tampi lakah Amos Kung timi fb account hmangtu nih “Adang politics le na policy (Naa timhtuah Ning le na saduhthah) tu kan ttial piak cang mi aneng tuk cang. A reltu ca zong ah mi a simh cang. NTK Kong lawng te cu” tiah a comment ve.
Amos Kung comment mi cu Salai Lungthli Tum nih lehnak a tuah i, “Amos Kung , ram le miphun a dawmi hna nih kan tih bikmi cu kan ram hi mithalo nih an uk sual lai timi khi a si” tiah lehnak a tuah.
Amos Kung nih a ti thanmi cu, “Ka nau kaa lawm, cu caah dahkaw pumpak soiselnak si ti loin nangmah i na policy le tuah na duh mi le na saduhthah tu kha tam deuh in kan ttial piak law ka tinak si cu” tiah a leh than ve. Salai Lungthli Tum nih aa thawh thanmi cu, “Amos Kung, kei ka policy cu mithalo nih kan ram uk hlah seh timi khi biapi bik a si ko” tiah lehnak a tuah than.
Atang deuh ah Matthew Mangliansang Salai timi fb account hmangtu nih “Nangmah nih MP cuh ding na si, mi dang le na sawisel pah hna si deuh rua lo” tiah a comment ve i, Salai Lungthli Tum nih “MP kan i cuh cu miphun caah thatnak tuah kan duh caah a si. Mitha lo nih kan ram a uk khawh lo nak hnga cawlcangh zong hi kan rian ngan bik a si ve” tiah lehnak a tuah than hi a si.
Salai Lungthli Tum nih Pu No Than Kap soiselnak a tialmi kongah midang comment a let ning hna zoh tikah “ka policy cu mithalo nih kan ram uk hlah seh timi khi a biapi bik a si ko” tiah a lehmi kan hmuh i Pu No Than Kap hi mithalo taktak ah a hmuh ca le “Mithalo nih kan ram uk hlah seh” timi policy aa ngeih caah a si timi fiang tein hmuh khawh a si.
A tangah nihin Salai Lungthli Tum nih Tutan thimnak ca ah biahalnak pahnih tlangtar in CNLD upa Pu No Than Kap a soiselnak rel chih ve.
Tutan thimnak ca ah biahalnak pahnih: 1nak ah A sining dihlak in CNF/A a dohtu, cauk tiang chuah in Falam mino lakah Hakha huatnak thlaici a tuhtu, 2010 thlennak hnu zong ah Hakha khualipi cu Falam peng ah thial a timhtu, Falam Laizo holh cu Laimi dihlak hramhram in cawnter ding ah Thein Sein cozah a haltu, Chuncung le Falam kar Zinghmuhtlang ramri kong hmanh ah thih ngamh in a buai ngammi, miphun le pengtlang thleidannak lungthin he a khatmi pa nih a hruaimi party CNLD maw na tanpi lai?
2nak ah cun Asilole Kawlmi le Laimi tbt miphun thleidannak lungthin a ngei lomi, ram le miphun kan dihlak caah nunnak pek ngamh in ralkap cozah a doh ngammi, a chungkhar tiang kaltak in ram le miphun caah kum 20 leng thong a tla i a sining dihlak in kan ram thlennak caah rian a tuan cuahmahmi Suu Kyi hruaimi NLD deuh dah vote kan pek lai?
Kan pemnak ramdang USA le Australia ah cun miphun thleidannak(racism) kan doh nain kanmah kan ram ah miphun tleidannak a tanpitu kan si sual maw? Hruaitu tha cu zeibantuk miphun an si zong ah tanpi le upat awk an si ko lo maw? Nain, hruaitu chiahru belte cu kan unau a si ko zong ah zeitik hmanh ah tanpi awk a si hnga lo.
NLD member lakah a sualmi an um ko lai, nain member sawhsawh nih party policy an hrawk kho lo. CNLD belte ah cun an hruaitu lubik hi tihnung ngaimi a si, Chinmi kan lung a fim lo i hruaitu thalo nih a hruaimi party kan tanpi ahcun kan miphun a buaiter lai i huatnak a karhter te lai tiah a facebook ah a tarlangh hi a si.
Source: Salai Lungthli Tum
Leave a Reply