Salai Lungthli Tum Sin In Saya Rungkaw Sin Cakuat

Salai Lungthli Tum nih Saya Rungkaw hi zengh ngai dawh a si. Salai Lungthli Tum nih Saya Rung Kaw kong he pehtlaih in ca a tialmi hi a tlawmbik voithum a si cang. Tu zing cu pengtlang kar huatnak le thleidannak thlaici na tuh tiah Saya Rung Kaw sin ca a kuat cang. Salai Lungthli Tum nih a tanglei bantukin saya Rung Kaw sin cakuat a tial.

“Atu bantuk in nangmah le na agent hna nih Lautu le Mara ah ‘Zophei nih cun tlun inn hmanh an kan onh lo, an kan thleidang, an kan nek, Zophei mee pek ding an si lo, arsa eiti khat Lautu le Mara kan tangti lai’ tibantuk in a thurhnawm tukmi pengtlang politics nan khel hi rak ngol cang hram uh, pumpak thutnak duh ah pengtlang kar huatnak le thleidannak thlaici na tuh hi kan miphun caah tihnung tuk. Tuanbia chiahru na tial a si.”

“Atu MP tling law Lautu le Mara ca lawng ah maw riantuan nai tim? Zapi caah hruaitu si nai tim deuh lo maw, sayapa? Kei cu ka meehmun simi Thantlang, Lautu, Mara le Zophei vialte thleidannak lungthin ngei loin ai ruang tein riantuan kai timmi a si.”

Salai LTT nih October 28, 2020 ni ah Saya Rung Kaw kong cu “CNLD Saya Rungkaw politics a khel ning khi Chin timi zong aa tlaih ti lo, ‘Zophei lawng maw MP an tuan peng lai? Lautu le Mara zong MP kan tuan ve a hau, Zophei nih an kan nek, Lautu le Mara cu thisa unau kan si caah kan tangti lai i Zophei kan tei hna a hau’ tiin Lautu le Mara tlang ah a thurhnawm ngaimi pengtlang politics a khel cuahmah ti a si,” tiah a rak tial.

Cu lawng siloin October 28, 2020 ni thiamthiam ah Saya Rung Kaw kong he pehtlaih in, “Tulio hi Lautu ah NLD phu le Saya Rungkaw tanpitu Lautu Kilvengbu kar an buai ngai, taza i cuai an timh cang. Aruang cu Lautu Kilvengbu nih ‘Saya Rungkaw cu Lautu miphun a si, Lautu dihlak nih kan tanpi hrimhrim a herh’ tiah Saya Rungkaw teinak a hmuhnak ding ah biatak tein an cawlcang, a cawlcangmi hna lakah cozah riantuantu zong an i tel ve.

Cutikah, NLD phu an thinhung tuk, ‘politics tuahnak ah pengtlang miphun min zuar awk si lo, zatlangbu nih pumpak caah cawlcangh awk a si lo, cozah riantuantu nih politics tuah awk a si lo’ an ti i taza cuai an timh hna hi a si” tiah a rak tial rih.

Hi tiin Salai LTT catialmi nih Saya Rung Kaw a zengh pah ngai timi a langhter tuk. Salai LTT cu amah Saya Rung Kaw kong lawng siloin Candidates dang pawl thangchiat rumro in ca a tial lengmang caah, MP tling ding thimnak aa cuhmi  a si lo, midang mee vaihvuanhter duh ah thimnak aa cuhmi a si” a ti tu zong an um phah cang.

Source: Salai Lungthli Tum