NLD Party Hi Ram Pumpi Aiawh Party A Si Timi Kong Ah;
NLD party hi Sept 1988 kum ah an rak dirh. A dirh tu (Founders) hna hi Suh Kyi dah lo cu ralkap bawi hlun lawngte an si.Brigadier General Aung Shwe, General Tin Oo.Colonel Kyi Maung le Brigadier General Aung Kyi hna an si. Cucaah NLD policy a tungtlang dirh tu hi Ralkap hlun lila an si i tlangcung mi pakhat hmanh an i tel lo.Atu NLD party i CEC ah tlangcung mi an i tel ahcun tlawm ngaih in an telh mi hna a si lai.
Hi ruang ah cun pei 1988 kum thiam ah Tlangcung miphun vialte komh mi UNLD (United Nationalities League For Democracy) cu an rak dirh i General secretary ah Dr. Lian Hmung Sakhong nih a rak tuan. Kha lio ah tlangcung party 25 cu UNLD ah an i fonh i CNLD zong a rak i tel ve cang. NLD hi ram pumpi huap Party rak si seh law UNLD kha dirh a herh hnga lo.Kawl cozah le party nih cunglei in a kan aiawh le huap a kan timh mi pei kan dohmi a ruang pakhat cu a si ve cu.
A ngaite ti ahcun miphun party le tlangcung miphun party dirh hmasa tu hna hi CNLD kan pa le dakaw an si.1990 thimnak zongah NLD bantukin CNLD zong an rak lut ve. Zei ruang dah CNLD hi atu lawng nan au? A luacia kum 30 zeidah nan tuah tiah chin NLD party an ti.Ruah ningin thil a kal khawh lo nak a ruang tampi a um.Culakah 1990 election result cu ralkap nih an pom lo.Cu lawng hlah! Party tiang hrawh piak a si.Atu CNLD hi 1990 lio CNLD policy kha a tharchuah mi a si. NLD Party he an kum khua ai khat.
NLD Party cu thih ngamh in Ralkap a do ngamtu Party kan si timi kongah;
CNLD hruaitu hna cu tlaih ding an si caah an zam.Caan karlakah a thi mi Salai Ram Ling Hmung te hna an um.An ral chiat ruangah an zam a si lo.An tlaih hna ahcun thlankhur nih a hngah cang hna. Ralkap a dotu cu chim hlah! CNA he pehtlai hmanh ah an kan hrem ning le saram thah in a kan thah.Suh Kyi caah kawl ralkap cu a pa fa le an si. An far hning a si.
Fungfek voikhat tuk zong a tong lo. A rian tuanti hawi le zong ralkap bawi hlun an si caah le kawl cu Saya tapeh nunphung an ngeih caah an dinh dorh deuh hrim hna.Cucaah NLD chungtel pawl nih NLD cu ralkap thih ngamh in a do mi kan si an timi khi tlangcung mi ralkap a dotu dirhmun he tahchunh awk a tha lo.
Dr.Lian Hmung Sakhong nih thih ngamh rak i thim seh law kan chin miphun nih zeitluk in dah kan sungh lai?Atu lio tuan mi lawng siloin Suh Kyi inn chung i hmurka a ngeih lo lio caan ah vawlei cung cozah kip sinah kawl ram kong abikin tlangcung mi nih kan covo kan ngeih lo ning kong a va cawnpiak mi hna khi chim awk a tam tuk lai.Amah nih thil sining kan problem a va cawn piak hna i Suu Kyi nih laksawng a ngah.Kei cu Suu Kyi nakin Dr.Lian Hmung Sakhong le Chin miphun covo ngahnak ding caah dothlennak a tuah tu hna hi kaa uar deuh.Thih ngamh in NGO rian miphun caah ka tuan a ti tu hna nih cun Suu Kyi an uar deuh.
Credit: Salai Tin Maung Win
Leave a Reply