Pastar rian cu rian sunglawi taktak asi bantukin zungzal kan thlarau nunnak lam hruaitu an si. Cu caah hi vawlei ramkhelnak Politics ah an i thlak lo ah a țha. Va ceih sawhsawh cu a țha ve ko nain biatak tukin Party kong ah țanhmi neih i mit au van i rengh i an kut hna an van i tum pah bu i, Party țanhnak hna biatak tuk i an chim ding a si loh.
Pastar cu member ngei cio an si hna. An member chung ah khan Party dang cio a um mi an si hna ti kha theih a hau. Pastar cu member caah thlum al ding an si hna.
CNF/A hi Chin Miphun huap in dothlennak tuahtu an si. Cucaah, Party țhut dan cuhnak kong ah țanhmi neih ding a si lo. CNF nih cun Party kong ah kan i thlak lai lo tiin an policy ah a um ko. Pumpak in țanhmi an neih ko zong ah an langhter ding a si lo. Chin Mipi hi Party Pakhat lawng a si lo ti kha theih a hau.
Tahchunhnak ah zei he dah ai lawh ti ah cun, khua pakhat ah nungak ai dawh takak mi pakhat a um. Cu nungak nu cu an khua tlangvaal nih an len cio. Thleidannak um lo tein a chonhbiak hna caah an khua tlangvaal nih cun uar lo awk a rak țha hrimhrim lo.
Asinain, tlangvaal pakhat kha uarmi duhmi a van neih cang cun a dang tlangvaal pawl kha cu an uai rup ko hna. Cucaah, tlangvaal dang nih uar awk a țha ti lo.
Pastar zong a member chung ah Party pakhat lawng a țanh ah cun a member chung ah Party dang caah a thlum al ti kho lo.
CNF/A zong Chin Miphun dih lak caah rianțuantu an si bang, kannih cu Party țhutdan cuhtu kan si lo. National Politics Chin mipi aiawhtu kan si ti kha i fiang ngai a hau.
Pastar kan si zong, CNF/A kan si zong kan dirhmun zei a si ti kha fiang ngai kan hau tiin. Sangling Thantlang.
Credit: Sangling Thantlang
Leave a Reply