A rummi pa nih a hnawmpung ah hnawm a rak charmi pa a hmuh i “Ka sifah lo hi Pathian thluachuah a si” a ti. Mi sifah pa nih a pawngkam a zoh i thil hruk loin aa chawkmi mihrut kha a hmuh i, “Ka hrut ve lo hi Pathian thluachuah a si” a ti ve.
Mihrut nih aa chawknak ah mizaw pakhat ambulance in an kalpi kha a hmuh i “Damnak ka hmuhmi hi Pathian thluachuah a si” a ti ve. Siizung a phanmi mizaw nih wheel card in an nammi mithi ruak a hmuh i “Aw ka thi rih lomi hi Pathian thawnnak thawng in a si” a ti ve.
Asiahcun, nunnak timi hi zeidah a si. Hmun hmun 3 ah len tuah hna u sih. 1. Siizung, 2. Thonginn, 3. Thlanmual.
Siizung kan kal ahcun zeitluk in ngandamnak man a ngei timi kan theih lai. Thonginn kan kal ahcun zalawn tein kan um khawhmi hi zeitlukin dah man a ngei timi na thei fawn lai. Cun thlanmual kan kal ahcun minung kan nunnak ah zeihmanh a hmunmi an um lo timi kan i fiang lai.
Nihin kan ke in kan lamhmi vawlei hi thaizing in kan lu chung a phan te lai. Taklawng in kan chuak i taklawng in kan kir than te lai. Vawlei kan nunnak chung caan tlawmpal ah zeihmanh i phorhlorhnak ngei loin kan um awk kan si.
Kan chuakka ahcun bawhte tiah dawt kan co. Kan thi tikah a thih ai cang tiah dawt kan co than. Cu kar lak ah mi nih huatmi si loin um zia thiam a biapi tuk. Nunnak timi cu chitkhat khualtlawn bantuk a si. Nain a poinak pakhat cu map aa tellomi khualtlawnnak bantuk a si.
Mah tein lam ka kawl chawm in lam i ser chawm a herhmi khualtlawnnak a si. Cucaah lam palh lo ding le tlu sual lo ding a biapi i kan khua cuanh ning le kan khuaruah ning a hman a biapi ngaingaimi nunnak a si. Crd.
Paul bantukin “Kei ka caah cun nunnak cu Khrih a si ko” (Filipi 1:21) ti khotu si i zuam uh si.
Leave a Reply