Chin ramkulh ah Thantlang khuapi cu thanchonak lei in Hakha khualipi a changtu khuapi pakhat a si. Hakha lei hmanh in cozah bawmhnak tampi an hmu lai. Thantlang khuapi cu Vice President a kai hlan hrimhrim in a thancho a rang ngaimi khuapi a si. Ka nulepa chuahkehnak khuapi a si caah ka khua le ka ram bantukin ka tlaihchan. Aa nuam ngaimi khuapi pakhat zong a si.
Hmunhma a bi ngaimi myo hmete pakhat ah ka miphun, ka theih hngalhmi an tamnak le puai caan ah nuam ngai in caan hmannak myo hmete pakhat a si. Cucu hlan lio kong a si. Khuapi a hung thancho ve tikah minung zong a sualmi an hung tam deuh ve. Dawtnak timi an thei kho ti lo. Pakhat le pakhat komh ngai in khuasak tawnnak khua hme cu atu ahcun ihuatnak, izumhlonak le ititernak lawngte nih a khat dih cang.
A deumi hmaipanhnak, a deumi zawnruatnak, a deuhmi dawtnak, nawlngeihnak le hakkauhnak hna ruangah chungkhat unau timi zong zeihmanh ah rel a si ti lo. Dawtnak timi zong nihchuak capo bantuk men in ruah a si cang. Lungrualnak a rawk dih cang. Biaknak lei ah an thlarua ngai ti tawnmi cu zanmang bantuk an si cang.
Tu kar cu Malaysia ah inn cung in a tla i a thimi nute khua lei tlunpinak kong cu mi thinlung a nuamter lo ngai. Malaysia in vanlawng in an ratpi i an chuahkehnak khua le ram tiang phanpi hnu ah Covid puh nawlngeihnak hmang cu zoh/theih a chia ko. Hi myone ohchohzihmu nih in zeidah a bochan i hi bantuk thil a tuah ngam hnga? Hi kongah vuancichoh zong nih zeihmanh a chim lo. Hluttaw Chairman zong nih zeihmanh a chim lo. Hi bantuk thimnak a naih lio caan ah mipi harnak an tlangtlak lo ahcun zeihmanh an si lo timi a langhnak a si.
Ramdang in Covid a rak phurmi minung tampi zong an cohlan ko. A nulepa a cawmtu nu pakhat ramdang ah vanchiatnak ton in a nulepa sin rak tlunpi cangmi a ruak khua chung lutter duhlotu Thantlang myone Okchohzihmu le a phu pawl tuahsernak hi a chia tuk hringhran. Lungrualnak a umlonak cu a tu ah fiang tein hmuh khawh a si cang. Khoika minung a si timi hmanh theihlomi nih khuapi a uk i a duhpoah in a tawrelnak tang ummi (ralchiat ruang i khuakhanmi a si kho) khuami hna nih vanchiatnak he khua a rak kirmi nan don lo. Nan mitthli he chungkhar ngaihchiatnak zong nan hnem hna lo.
Mah khuapi caah zeihmanh a tuah kholomi palai pawl cu hi hnu thimnak ah zeitin kan I bochan kho lai i mee kan pe khawh lai? Line chungah a chim kho ngaimi nu hna zong tutan cu nan aw zeihmanh theih ding a um tung lo. Abiapi in Thantlang mipi hna ilungrual lo ruangah a miphun dang pakhat nih tuahsernak kan ing ko hi. Cozah tlai lio nawlngeitu hna nih zeihmanh tuanvo an lak lo maw si? Zeibantuk harsatnak ruangah hi tluk in harnak kan tong?
Thinlung a fak ko. Tuzan cu faktuar chungkhar lei nulepa hna le khuapi nawlngeitu cheukhat tonbiaruahnak ruangah atu cu thlanmual ah a ruak thial a si cang tiah kan theih. Chin duhmi cu Vice President khuapi pakhat a si ve i hi bantuk thil a cang tikah phan a um ngai. Khuami lungruallonak zong a lang ngai. Khuami nih mee pekmi palai pawl zong zeihmanh bochan awk an tlak lonak a lang ngai fawn. Khua chung mipi zeihmanh a rellomi Okchozi phu tuahsernak hi cozah limhang zortertu zong a si. Vice President pi khua pakhat a sinak upat awk tlak in zeihmanh kan silonak a kan theihter cang. By Ni Lian Sang
Note: Hi hi pumpak tialmi asi kho, nain Chin National Army facebook page ah tarlanghmi a si caah CNA nih tuahmi bantukin langhter a si.
Leave a Reply