Tu lio cu Kawlram ah Covid hleikua a karh cuahmah lio a si i mizaw an tam pinah Quarantine in chiahmi hna zong an tam ngai ve. Quarantine chiah hi a tlawmbik ni 14 (zarhhnih) chung a si tikah an lung re a thei lai pinah an um hrimhrim a har lai i khua zaza a ruatmi an tlawm hrimhrim lai lo timi cu theih a si.
Cu bantukin umhar lileng in a ummi Quarantine chiahmi pawl cu hlasak le music lei a thiammi hna nih an umhar phennak ah tiah hla an sak piak tawn hna i thazaang an ve pek tawn hna.
Cu bantukin tutan zong Kawlram minthang hlasakthiam pawl Sung Tin Par, Kaw Ni, Mi Mi Win Phay, Chaw Su Khin le Tin Zar Maw hna cu Innya Covid thlawpnak Center ah va kal in Covid hleikua mizaw pawl thazaang an va pek i hla an va sak piak hna tiah 36 Myanmar nih an video he a tarlangh hi a si.
Video chungah minung pakhat nih Innya Center ah a si. Mizaw pawl caah entertainment kan rak tuahpiak hna. Khi ka lei a ummi hna khi Positive mizaw pawl an si tiah minung pakhat nih a chim i an zate in hla an sak piak hna. A tang bik ah an video zoh khawh ding in tar chih a si.
Nihin tiang Kawlram chung mizaw dihlak hi 32351 an si cang i cu chung ah minung 14706 an dam cang. Cu vialte a zawmi chungah minung 33 an thi cang i atu siizung aa thlawp liomi dih lak hi 765 an si tiah Myanmar Health and Sport Ministry thawngthanh ning in theih a si.
https://www.facebook.com/36Myanmar/videos/3276406779081569
Video: 36Myanmar
Leave a Reply