Nihin Chin mi social media ah a larbikmi thawngpang cu Surbung airport ah vanlawng a tumnak a si. A tangbik ah James Thang nih Live video a thlahmi tar chih a si.
Chin ramkulh chungah a voikhatnak bik vanlawng a tummi a si tikah Chinmi kan lung aa lawm khun. Nain tu lio cu Covid-19 boruak ruangah pawngkam khuami nih tha tein an don khawh lo i, khat lei in a poi ko.
Chin Ramkhulh chungah a hmasabik vanlawng bual Falam, Surbung ah tuahmi cu June 25, 26 tiang vanlawng nih khuacaan siseh, tum awk ah a tha maw timi (flight check) cunglei in an rak zoh fel cang.
Cu lio ah vanlawng in cunglei in an rak zohfel hnu ah June 27 ah Vanlawng tum (Test Landing) dingin timhnak an ngei nain an tumter thai lo. Vanlawng tumnak dingah a tha ko zeihmanh buaibainak a um lo ti si caah nihin October 27 ni ah a voikhatnak Chin ramkulh chung vanlawng a ttum hi a si.
Nihin vanlawng a tum cu vanlawng bual chungah mitampi lut a ngah lo caah tuanvo ngeitu mi tlawmpal lawng nih a rak ra mi an don kho hna. Tutan a voikhatnak Surbung vanlawng bual i vanlawng tumnak ah a rak ra ve khomi cu Vice President te chung le vanlawng lei in tuanvo ngeitu bawi tlawmpal lawng an si tiah theih a si.
Surbung hi Yangon in direct rat ahcun suimilam 4 hrawng a rau lai i, Mandalay ah i din pah ding si cun minute 50 hrawng a rau deuh lai tiah tutan a rak zual ve mi pilot pakhat nih a chim. Zei si hmanah a tangah Chin ramkulh ah a voikhatnak bik vanlawng tum lio video kan tarpiak chih hna.
https://www.facebook.com/james.thang.1232/videos/3697646456912337
Video: James Thang
Leave a Reply