Taingen Khua A Latu Chin Ralkap Hna Cu Tualchung Mi Nih Sunglawi Ngai In Pangpar He An Rak Don Hna

Taingen khua a latu Chin ralkap hna cu tualchung mi nih sunglawi ngai in pangpar he an rak don hna. Taingen khua kahdohnak ah hin SAC lei in ralkap 30 an thi i, 40 hrawng hliam an pu. Chin ralkap ṭangṭi phu nih hriamnam tamlak zong an laak. Chin ralkap ṭangṭi phu lei in ralkap 8 nih ram le miphun ca ah nunnak an pek ve. Rel chap: Taingen SAC Sakhan Pathum Cu Chin Ralkap Nih An Lak Cang. Chinram, Tedim peng Taingen khua i SAC ralkap sakhan pathum cu January 16, zinglei ah Chin ralkap ṭangrual hna nih an lak cang tiah theih a si.

SAC Jet Fighter nih bomb a thlak pin ah Kalay in miakpi 120 MM in an kah tuk hna caah Chin ralkap nunnak a liam mi zong an um. Hliamtuar zong an um tiah theih a si. Taingen kahdohnak ah CNA, Chin Rifle (CR), CDF CDM Siyin, CDF-KKG, CDF-Thantlang, CDF-Hakha, PDA, CDF-Hualngoram, CDF-Zanniatram le TCDF hna an i tel. Taingen SAC ralkap hi Chin ralkap hna nih 2023 chung ah an rak kah pah cang, asinain pehtlai in an kap kho lo. An i kah chel, an i dinh chel tiin a rak si.

Taingen hi kan lak khawh cang caah Chinram ah a kai ding mi SAC ralhrang hna cu kan kham khawh deuh cang hna lai. Kanmah lei a thi mi an um. SAC lei a thi mi le hriamnam kan lak mi zong an um ko. Tlamtling deuh in kan thanh te ko lai” tiah kahdohnak ah aa tel mi Chin ralkap pakhat nih The Chin Post ah a chim. January 12, 2024 khan kah an thawk ṭhan i ni 4 a rauh hnu ah an lak khawh hi a si. Crd- the chin post.

Thawng dang: SAC Nih A Chuahmi Ralkap Ukhruainak Nawl Vialte Kan Hnon Dih Tiah MNDAA Nih Thanh, Hramhram in nawlngeihnak a latu SAC ralkap nih an thanh mi ralkap ukhruainak nawl chuah mi telh in ralkap he pehtlai in nawl an chuah mi vialte cu hnon a si dihnak kong Kokang ralkap MNDAA nih an thanh. Nihin January 15 ah China ca in MNDAA nih an thanh mi kong he pehtlai in MNDAA chimnak nawlngei Li Kyar Win an hal i, “SAC ralkap le an kuttang phu nih an thanh mi nawl chuah mi vialte cu kan hnon dih hna,” tiah a chim.

Laukkai a pakhatnak hmunram chung ah i ukhruaknak ca nawl chuah mi, ralkap he pehtlai in nawl chuah mi le Martial Law vialte hnon a sinak kong zong kan thanh cang” tiah MNDAA chimnak nawlngeitu nih cun a chim. Tukum January thla hramthawk ah Laukkai hmunram Dah-Kah-Sah hmunpi in Brigadier 6 le SAC ralkap chungtel 2,400 leng nih hriamnam an chiah hnu in Laukkai hmunram a ningpi in MNDAA nih an uk dih.

Leave a Comment

Leave a Reply

Your email address will not be published. Required fields are marked *