Chin ramkulh chaklei Tedim peng ah nizan October 7 ah nupi hal ding in a kal mi hna motor cu aa let i motor chung cuang mi minung 6 nunnak a liam. Thalmaul khua in Tedim khua ah nupi hal dingin a kal mi motor cu a kir lei ah aa let i, motor khaltu telh in motor aa cit mi dihlak nunnak a liam dih, tiah tualchung mi hna nih Zalen ah an chim. “Tlangval pa chungkhat hna nih a nungak nu chungkhar hna cu nupi ca ah va hal dingin an kal i an kir lei, khua a muih cang hnu ah motor cu horkuang ah a tla,” tiah tualchung mi pakhat nih a chim.
Aa ṭhi-um ding hi nihin October 8 ah Malaysia ram EBC KL Biakinn ah ṭhitumnak tuah ding an si, tiah a chim chap. Atu bantuk in chiat an ton ruangah an i ṭhitumnak puai zong an ṭhulh rih, tiah theih a si, crd- The Chin Post. Thawng dang relchap- Kalaymyo Ah Tlangval Pumpululh Chuih Thiam Pakhat Cu SAC Ralkap Nih An Thah, Sagaing ramṭhen, Kalaymyo Tahan sang um, Tahan Fuller AG Church kam ah October 6 zanlei suimilam 2:00 hrawngah pumpululh chuih thiam tlangval (tleirawl) pakhat cu SAC ralkap nih an thah, tiah theih a si.
Lian Muan Sang le a hawilei pathum cu October 6 zanlei suimilam 3:00 ah Kalaymyo, U-17 pumpululh chuih dingin cycle pakhat ah an pali in an i cit lioah SAC ralkap nih an kah hna i Lian Muan Sing cu a nunnak a liam, tiah Zalen nih a ṭial. “Cycle pakhat ah minung pali an i cit i Lian Muan Sing hi a hnu bik ah a ṭhu. Cu lioah SAC ralkap nih meithal in an kah hna i Lian Muan Sing cu a hmun ah a thi colh. A hawile cu an lau tuk i an zaam,” tiah a thimi Lian Muan Sing a hawipa nih a chim.
Hmailei caan ah Myanmar ram pumpi tiang zong in ruakchannak a um mi pumpululh chuih thiam nunnak a liam hi cu kan ngaih a chia tuk hringhran ko, tiah Lian Muan Sing a hawile nih an chim. Thawng dang relchap- Butalin Peng Ah Milu Relnak Min Cazin A Latu Hna Cu PDF Nih Hriamngan In An Kah Hna, Sagaing ramṭhen, Butalin peng ah milu relnak min cazin a latu SAC ralkap hna cu October 6 zanlei ah hriamngan in kan kah hna, tiah Ba Thu Kyawal Column nih an langhter.
SAC ralkap sakhan he naihniam in a ummi Tapetaw khua ah milu relnak min cazin a latu SAC ralkap 60 hrawng cu PDF nih hriamngan lung 4 in an kah hna, tiah theih a si. Cu kahdohnak ah cun Yinmarbin pengkomh No. 9 Battalion, N.W.P.F Ba Thu Kyawal Column, Anonymous Hero(LPDF) le Yung Min phu hna i bawm in an kah hna, tiah theih a si. October 1 ah milu relnak cazin la dingin timhtuahnak a ngeimi Butalin khuapi um GAD zung zong Yinmarbin pengkomh No. 9 Battalion, Ba Thu Kyawal Column in ralkap nih kutser 120mm in an rak kah cang hna.
Leave a Reply