Chin ramkulh, Tedim khuachung le khuate cheukhat ah October 12-15 tiang PDF-Zoland le mipi tonbiaruahnak an ngeihnak kong cu PDF-Zoland nih an thanh. Tedim peng khua cheukhat, SAC lei zong ṭang lo, PDF-Zoland zong tha a pe lem lo i mah um in a ummi khua 6 hna ah PDF-Zoland cu an kal i khuami cu tonbiaruahnak an ngeihpi hnanak kong zong an thanhmi ah cun an langhter chih. Tedim khuachung cheuthum cheuhnih cu PDF-Zoland nih kan uk khawh,Tedim peng chung khuate a tam-u zong kan uk khawh.
Mah um in a ummi khuate cheukhat hna he zong tonbiaruahnak kan ngei cang, tiah PDF-Zoland in ṭuanvo ngei pakhat nih a chim. Tedim peng mipi hna he tonbiaruahnak a ngeimi PDF-Zoland cu motor 4 le motorcycle zeimawzat in ralkap 100 leng an si. SAC ralkap le palik hna zong khuapi chung kahdohnak fak a chuah hlan ah mipi sin i fonh ding in PDF-Zoland nih theihternak an rak tuah cang hna.crd- The Chin Post. Thawng dang: Yesagyo Peng Ah SAC Ralkap Nih PDF Sakhan Pahnih An Laak. Magway ramṭhen.
Yesagyo peng Yelaykyun hmunram kahdohnak ah SAC ralkap nih PDF sakhan pahnih an laak, hriamnam le zen-kuan zong an laak, tiah theih a si. October 14 zing suimilam 11:00 hrawngah Yesagyo peng ah hmunhma thianhhlimnak a tuahtu SAC ralkap hna nih Nan O khua sianginn chung ah kutser meithal sau zun 21, meithal tawi zun 1, 60mm hriamngan zun 17 le RPG zun 3 kan laak, tiah an langhter. SAC nih an thanhmi kong he pehtlai in Myingyan Black Tiger ṭuanvo ngeitu Maik Khe nih, SAC ralkap nih sakhan an laakmi cu a dikmi a si ko.
Hi sakhan hi ṭangṭi phu hna he hriamnam kan chiahnak hmun a si. Hriamnam an laak zat cu a fiang rih lo,” tiah a chim. Cu pinah Yesagyo peng Maytaw khua um sianginn chung in kutser meithal sau zun 3, bomb phun 13, bomb hri pe 100, seh 1, cement tun 65 le mei seh 1 zong an laak, tiah theih a si. Yesagyo peng Yelaykyun hmunram um Kyuaikone, Kyunngo le Nan O khua zong SAC ralkap nih an khangh i kum 51 tluk Nweni khuami nu pakhat zong an thah, tiah tualchung mi hna nih an chim.
Leave a Reply