Sagaing Ramṭhen, Minmu Peng Ah PDF Ralkap 25 Nunnak A Liam! Sagaing ramṭhen, Minmu peng Chayyartaw khua pawng ah nizan September 22 zan ah SAC ralkap nih PDF cu a thli in an kah hna i PDF ralkap 25 an nunnak a liam. PDF ralkap 18 nih an i citmi motor cu Miynmu le Myaung karlak an kal lio ah SAC ralkap nih an kah hna i an dihlak in an nunnak a liam. Cu hnu caan tlawmpal ah PDF 18 an thihnak hmun ah cycle in a kalmi PDF ralkap 7 zong kah an tong ṭhan i an dihlak in an nunnak a liam ve, tiah PDF Battalion 5 in ṭuanvo ngeitu nih a chim.
Nunnak a liammi hna hi Sagaing pengkomh PDF Battalion 5, 6 le Miynmu peng Kyawmin khua Pah Kah Phah hna an si. Chayyartaw khua pawng ralhrial mi hna va bawmchan dingin an kal lio ah atu bantuk kah an tong, tiah Battalion 5 in ṭuanvo ngeitu nih cun a chim. SAC kuttang Telegram Channel nih an langhter mi hmanthlak ah PDF motor a kaangmi pakhat, thlisen lakah a thimi PDF ruak hna le meithal zun 8 zong hmuh khawh a si.
A thimi PDF hna meithal cu SAC ralkap nih an laak dih i an ruak tu cu an kaltaak hna. SAC ralkap an kal hnu in PDF ruak hna cu an chungkhar le PDF ralkap hna nih an fimhlawm hna, tiah Myanmar Now nih a ṭial. PDF ralkap hna hi Mandalay khuapi pawng Myintnge khuami Bo Hpawng Dai phu an si, tiah SAC kuttang Telegram Channel nih cun an langhter, crd- The Chin Post. Thawng dang relchap- Lieutenant General Soe Htut Sinah Palik Bawi Ngan Pahnih Nih Rithaisii Zuar Khawhnak Ca Ah Ngunkhuai An Pek.
SAC ralkap nih chekhlatnak an tuah cuahmah mi Minister For Home Affairs a rak tlaitu Lieutenant General Soe Htut sinah rithaisii dohnak zung uktu palik bawizik Win Naing, Shan ramkulh palik bawizik Tin Ko nih rithaisii le tangka in lentecelhnak ca ah thla khat ah sing thong in ngunkhuai an pek, tiah Khit Thit Media nih a ṭial. Min Aung Hlaing nih Lieutenant General Soe Htut cu August 3 ah a rank in a rak thlak i a nupi le a fale hna he eihmuarnak, rampi biathli phuangtu le nawlngeihnak ningcang loin hmannak in chekhlatnak an tuah, tiah an langhter.
Lieutenant General Soe Htut cu chekhlatnak an tuah i eihmuarnak le rampi biathli phuannak ah pehtlaihnak a ngeimi palik bawi Sein Lwin, Aung Htey Myint, palik bawi Ngian Myint Kyaw telh in palik officer cheukhat zong an rian in an dinhter dih hna. Asinain Lieutenant General Soe Htut le a nupi sinah rithaisii le tangka in lentecelhnak ca ah ngunkhuai a petu palik bawi Win Naing le Tin Ko cu an luat, tiah theih a si. Rithaisii lei tlaitu palik bawizik Win Naing nih hin Soe Htut sinah ngunkhuai a pek ruangah Myanmar ram ah rithaisii cu tlaih khawh phun a si lai lo.
Myanmar ram ah KTV an hunnak Hi khan, Bayinnaung Worldwide Brave bar ah WW le K hna zong mithmuh hngan in an zuar. Cu zong cu Win Naing nih Soe Htut sinah ngunkhuai a pek ruangah a si. Cu pinah Shan ramkulh ah hunmi KTV le tangka in lentecelhnak ca ah Shan ramkulh palik bawizik Tin Ko nih Soe Htut sinah thla khat ah Kyats 100,000,000 ngunkhuai a pek lengmang, tiah hi kong a a hlathlaitu hna nih Khit Thit Media ah an chim. Minister For Home Affairs Lieutenant General Soe Htut, a rian phuahnak kong ah Tuluk zong aa tel tiah zumh a si.
A ruang cu Myanmar le Tuluk ramri ah tangka in lentecelhnak le online in tangka hlennak a tam tuk i Tuluk nih dantat dingin SAC cu a nawl lengmang nain Soe Htut nih a ngaih lo caah Min Aung Hlaing nih a rian a dinhter, tiah Naypyidaw um ralkap chung ummi hna nih an chim. Soe Htut cu Insein thong ah Hluttaw palai Phyu Zeyar Thaw, 88 hruaitu Jimy telh in minung 4 hna hri thlai in thih dan a rak petu ah lutlai a si.
Leave a Reply