Thawngpetu(Dalan) Panga Tlaih An Si

SAC Nih Kanan Khua Bomb An Thlaknak Kong He Pehtlai In Thawngpetu(Dalan) Panga Tlaih An Si, Sagaing ramṭhen, Tamu peng Kanan khua bomb thlaknak kong he pehtlai in SAC ralkap sin thawngpetu(dalan) panga an tlaih hna, tiah theih a si. SAC ralkap nih Kanan khua cu Fighter in January 7 zing suimilam 10:00 hrawngah bomb an rak thlak i khua mi minung 17 nunnak a rak liam. Minung 19 hliam an tuar i New Eden, Saint Peter Biakinn le Sianginn telh in khuami inn zeimawzat zong a rawk.

SAC ralkap nih Kanan khua bomb an thlaknak kong he pehtlai in SAC ralkap sin thawngpetu minung panga cu PDF nih an tlaih hna i pakhat cu an thah. A taangmi pali cu an hren rih ko hna, tiah Kanan khua mi pakhat nih The Chin Post ah a chim. SAC ralkap nih kan khuachung ah bomb an thlak ruangah kum 40 in tanglei minung 19 hliam an tuar i khuami cheukhat cu a himnak hmun ah ral an hrial. “Kan ruahnak le kan thinlung zong a caw dih i thingphang thlalau in kan um zungzal ko,” tiah a chim chap.

Kanan khua hi Khampat khuapi in Farlong 2 hrawng a hlatnak ah a ummi a si i inndawng 2,000 hrawng a umnak a si. Hliam a tuarmi hna cu thlopbul cuahmah an si i pumpak le bu dangdang nih an bawmhchanh hna. Atu tiang ah NUG lei in bawmhnak cu a um rih lo, tiah Kanan khua mi pakhat nih cun The Chin Post ah a chim. Thawng dang relchap- Shan Ramkulh Thlanglei Ywangan Peng Pyusawhti Hruaitu Pakhat PDF Nih An Fimhlawm, Shan ramkulh thlanglei, Ywangan peng, Taungkyar khua ah.

SAC ralkap kuttang Pyusawhti hruaitu pakhat kan kah i a hmun ah a thi colh, tiah Ywangan PDF – JPRF nih nihin January 11 ah an thanh. Ywangan khuapi le Pintaya peng ah Pyusawhti pawl training a pe tawntu SAC ralkap kuttang um Pyusawhti hruaitu U Kyaw Me cu inn a ṭin lio zanlei suimilam 6:45 hrawng ah Ywangan PDF – JPRF le company 3 Hmawbuyin ṭangṭi phu nih an fimhlawm. Cu kahdohnak ah cun tualchung hriamtlai phu nih AK kuanfang 10, kutcheh bomb lung 2 le ralkap uniform an laak khawh, tiah theih a si.

Tualchung hriamtlai phu nih an fimhlawm mi Pyusawhti hruaitu cu Lawksawk khuapi Battalion 509 in training a dih mi a si i SAC ralkap he i bawm in PDF a dohtu le inn khangh tibantuk ah aa tel peng mi a si pin ah Division 55 uniform i hruk in rallam sial ah aa tel peng mi a si i SAC ralkap he naihniam ngaiin in a um mi a si, tiah JPRF nih an chim. Ywangan peng le Pintaya peng chung ah a um mi SAC ralkap le Pyusawhti pawl cu a hriamnam chia ding in le mizapi sin ah i fonh ding in Ywangan PDF nih an thanh hna i, mizapi sin ah fonh a duh mi nih cun Ywangan PDF – JPRF page ah rak kan pehtlai u, tiah Ywangan PDF nih cun an thanh.

Leave a Comment

Leave a Reply

Your email address will not be published. Required fields are marked *